മുഹമ്മദ്നബിﷺയുടെ ജീവചരിത്രം

🕋അദ്ധ്യായം 1. ജാഹിലിയ്യ :

മുഹമ്മദ് നബിക്ക് മുമ്പ് അറബ് ഗോത്രങ്ങളുടെ അവസ്ഥ

----------------------------------------------------------

ഇബ്രാഹീം നബി (അ) യുടെയും മകൻ ഇസ്മാഈൽ നബി (അ) യുടെയും കാലം മുതൽ മക്കയിലെ ജനങ്ങൾ തൗഹീദിൽ (ഏകദൈവവിശ്വാസം) അധിവസിക്കുകയും കഅ്ബയെ അല്ലാഹുവിന്റെ ഏകത്വത്തിന്റെ കേന്ദ്രമായി പരിപാലിക്കുകയും ചെയ്തുപോന്നു.

​എന്നാൽ കാലങ്ങൾക്കുശേഷം മക്കയുടെ അധികാരം ഖുസാഅ ഗോത്രത്തിന്റെ കൈകളിലെത്തിപ്പെട്ടു. ഈ ഗോത്രത്തിന്റെ തലവനായിരുന്നു അംറ് ബിൻ ലുഅയ്യ് അൽ-ഖുസാഈ.

 അംറ് വലിയ ദാനധർമിയും മതകാര്യങ്ങളിൽ ആളുകൾ ബഹുമാനിക്കുന്ന പ്രമുഖനുമായിരുന്നു. അതിനാൽ തന്നെ ജനങ്ങൾ അദ്ദേഹത്തിന്റെ വാക്കുകളെ ശരിവെക്കുകയും അദ്ദേഹത്തെ പിന്തുടരുകയും ചെയ്തു.

​അംറ് ബിൻ ലുഅയ്യ് ഒരിക്കൽ സിറിയയിലേക്ക് (ശാമ്) യാത്ര തിരിച്ചു. അവിടെവച്ച് അൽ-ബൽഖാ എന്ന പ്രദേശത്തുള്ള ആളുകൾ വിഗ്രഹങ്ങളെ ആരാധിക്കുന്നത് അദ്ദേഹം കണ്ടു.  ഇത് എന്താണെന്ന് അന്വേഷിച്ച അംറിനോട് അവർ പറഞ്ഞു: "ഇവ ഞങ്ങൾ ആരാധിക്കുന്ന വിഗ്രഹങ്ങളാണ്. ഞങ്ങൾ മഴയ്ക്ക് പ്രാർത്ഥിച്ചാൽ ഇവ മഴ തരും, സഹായം ചോദിച്ചാൽ സഹായിക്കും."  ഇതുകണ്ട അംറ് ബിൻ ലുഅയ്യ് അവരിൽ നിന്ന് 'ഹുബൽ' എന്ന വിഗ്രഹത്തെ ചോദിച്ചുവാങ്ങി മക്കയിലേക്ക് കൊണ്ടുവന്നു. അദ്ദേഹം ഹുബലിനെ കഅ്ബയ്ക്കുള്ളിൽ സ്ഥാപിക്കുകയും ജനങ്ങളോട് അതിനെ ആരാധിക്കാനും ബഹുമാനിക്കാനും കൽപ്പിക്കുകയും ചെയ്തു.

ഖുർആനിൽ പരാമർശിച്ചിട്ടുള്ള നുഹ് (അ) യുടെ ജനതയുടെ വിഗ്രഹങ്ങളായ വദ്ദ്, സുവാഅ്, യഗൂഥ്, യഊഖ്, നസ്ര് എന്നിവ പ്രളയത്തിനു ശേഷം ജിദ്ദ തീരത്ത് മണ്ണിലടിഞ്ഞു കിടപ്പുണ്ടായിരുന്നു. ഒരു ജിന്ന് ഉപദേശിച്ചതനുസരിച്ച് അംറ് ബിൻ ലുഅയ്യ് അവ തോണ്ടിയെടുത്ത് മക്കയിലെത്തിക്കുകയും, ഹജ്ജ് തീർത്ഥാടനത്തിന് എത്തുന്ന വിവിധ അറബ് ഗോത്രങ്ങൾക്ക് വിഭജിച്ചു നൽകുകയും ചെയ്തു. അങ്ങനെ തൗഹീദിന്റെ കേന്ദ്രമായിരുന്ന മക്കയിലും പരിസരപ്രദേശങ്ങളിലും പതുക്കെ  ശിർക്ക് വ്യാപിച്ചു

​മറ്റ് പ്രധാന വിഗ്രഹങ്ങൾ:

​മനാത : അൽ-മുശല്ലൽ (ഖദീദ്) ഭാഗത്ത് സഖീഫ്, ഔസ്, ഖസ്രജ് ഗോത്രങ്ങൾ ആരാധിച്ചിരുന്നത്.

​ലാത്ത: താഇഫിൽ സഖീഫ് ഗോത്രം ആരാധിച്ചിരുന്നത്.

​ഉസ്സ : നഖ്‌ല താഴ്‌വരയിൽ ഖുറൈശികളും മറ്റ് ഗോത്രങ്ങളും ആരാധിച്ചിരുന്നത്.

 (ഇറാഖ് മ്യൂസിയത്തിലുള്ള ലാത്ത ഉസ്സ മനാത്ത എന്നിവരുടെ പ്രതിമ )

സഹീഹുൽ ബുഖാരിയിൽ നബി ﷺ പ്രസ്താവിച്ചത് കാണാം: 

​"അംറ് ബിൻ ലുഅയ്യ് അൽ-ഖുസാഈ തന്റെ കുടൽമാലകൾ നരകത്തിൽ വലിച്ച് ഇഴഞ്ഞുനീങ്ങുന്നത് ഞാൻ കാണുകയുണ്ടായി. ഇബ്രാഹീം നബിയുടെ ധർമ്മത്തെ (തൗഹീദിനെ) മാറ്റിമറിക്കുകയും അറേബ്യയിൽ ആദ്യമായി വിഗ്രഹാരാധന കൊണ്ടുവരികയും ചെയ്തത് അവനായിരുന്നു." (സ്വഹീഹ് അൽ-ബുഖാരി)

അറേബ്യക്കാർ ദൈവത്തിനും തങ്ങൾക്കുമിടയിൽ മധ്യസ്ഥരായി വിഗ്രഹങ്ങളെ പ്രതിഷ്ഠിച്ചു. ഹുബൽ, ലാത, ഉസ്സ, മനാത് എന്നിവയായിരുന്നു പ്രധാന വിഗ്രഹങ്ങൾ. കഅ്ബയ്ക്ക് ചുറ്റും മാത്രം 360-ഓളം വിഗ്രഹങ്ങൾ സ്ഥാപിക്കപ്പെട്ടിരുന്നു.

♦️​അന്ധവിശ്വാസങ്ങളും ആചാരങ്ങളും:

​അമ്പ് ഉപയോഗിച്ചുള്ള ഭാഗ്യപരീക്ഷണം (അസ്‌ലാമ്): എന്തെങ്കിലും യാത്രയ്ക്കോ വിവാഹത്തിനോ മറ്റ് പ്രധാന തീരുമാനങ്ങൾക്കോ മുൻപ് അമ്പുകൾ കുലുക്കിയെടുത്ത് ദൈവഹിതം നോക്കുന്ന സമ്പ്രദായം ഉണ്ടായിരുന്നു. എന്ന് മാത്രമല്ല കഅബക്കകത്ത് ഇബ്രാഹിം നബിയും ഇസ്മായിൽ നബിയും ഇത്തരത്തിൽ അസ്ലാമുകൾ -അമ്പ് ഉപയോഗിച്ചുള്ള ഭാഗ്യപരീക്ഷണം- പിടിച്ചുനിൽക്കുന്ന ചിത്രങ്ങൾ ഖുറൈശികൾ വരച്ചു വച്ചിരുന്നു ! മക്കാ വിജയ സമയത്ത് മുഹമ്മദ് നബി അവ നശിപ്പിക്കുകയുണ്ടായി.

​"പ്രവാചകൻ (സ) കഅ്ബയ്ക്കുള്ളിൽ രൂപങ്ങളും ചിത്രങ്ങളും കണ്ടപ്പോൾ അവ മായ്ച്ചുകളയാൻ കൽപ്പിക്കുന്നത് വരെ അതിൽ പ്രവേശിച്ചില്ല. അങ്ങനെ അവ മായ്ച്ചുകളയപ്പെട്ടു. ഇബ്രാഹീം (അ), ഇസ്മാഈൽ (അ) എന്നിവരുടെ കൈകളിൽ അമ്പുകൾ (ഭാഗ്യം നോക്കുന്ന അസ്‌ലാമുകൾ) നൽകപ്പെട്ട രൂപത്തിൽ ചിത്രീകരിച്ചത് കണ്ടപ്പോൾ പ്രവാചകൻ (സ) പറഞ്ഞു: 'അല്ലാഹു അവരെ (ഖുറൈശികളെ) നശിപ്പിക്കട്ടെ! അല്ലാഹുവാണെ സത്യം, ഇബ്രാഹീം നബിയോ ഇസ്മാഈൽ നബിയോ ഒരിക്കലും അമ്പുകൾ കൊണ്ട് ഭാഗ്യം നോക്കിയിട്ടില്ല.'" സഹീഹുൽ ബുഖാരി.

♦️​കാഹിനുകളും (ജ്യോത്സ്യന്മാർ) അർറാഫുകളും: ഭാവി പറയുന്ന ജ്യോത്സ്യന്മാരെയും അദൃശ്യകാര്യങ്ങൾ അറിയാമെന്ന് അവകാശപ്പെടുന്നവരെയും ജനങ്ങൾ അന്ധമായി വിശ്വസിച്ചു.

♦️​ബലി അർപ്പിക്കൽ: വിഗ്രഹങ്ങൾക്ക് മുന്നിൽ മൃഗങ്ങളെ ബലി അർപ്പിക്കുകയും, അവരുടെ പേരിൽ ചില ഒട്ടകങ്ങളെ സ്വതന്ത്രമായി വിട്ടുനൽകുകയും (ബാഹീറ, സാഇബ, വസീ ല, ഹാം എന്നിങ്ങനെ പേരിട്ട്) അവയുടെ മാംസമോ പാലോ ഉപയോഗിക്കുന്നത് വിലക്കുകയും ചെയ്തു.

"അല്ലാഹു ബാഹീറയോ, സാഇബയോ, വസീ ലയോ, ഹാമോ ഒന്നും നിശ്ചയിച്ചിട്ടില്ല. എന്നാൽ സത്യനിഷേധികൾ അല്ലാഹുവിന്റെ പേരിൽ കള്ളം കെട്ടിച്ചമയ്ക്കുകയാണ്. അവരിൽ അധികപേരും ചിന്തിച്ച് മനസ്സിലാക്കുന്നില്ല."  (സൂറത്തുൽ മാഇദ: 103)

​ജാഹിലിയ്യാ കാലഘട്ടത്തിൽ അറബികൾ ദൈവപ്രീതിക്കായും വിഗ്രഹങ്ങളുടെ പേരിലും ചില ഒട്ടകങ്ങളെ വിശുദ്ധമായി നേർച്ചയായി പ്രഖ്യാപിച്ച് സ്വതന്ത്രമായി വിടുമായിരുന്നു. 

​ബാഹീറ:

അഞ്ച് തവണ പ്രസവിക്കുകയും, അഞ്ചാമത്തെ പ്രസവത്തിൽ ആൺകുട്ടിയുണ്ടാവുകയും ചെയ്താൽ ആ ഒട്ടകത്തിന്റെ ചെവി പിളർന്ന് വിഗ്രഹങ്ങൾക്കായി മാറ്റിനിർത്തും. ഇതിൽ യാത്ര ചെയ്യാനോ പാല് കുടിക്കാനോ അനുവദിച്ചിരുന്നില്ല.

​സാഇബ :

രോഗശമനത്തിനായോ യാത്ര സുരക്ഷിതമായി പൂർത്തിയാകുന്നതിനായോ നേർച്ചയാക്കി വിഗ്രഹങ്ങളുടെ പേരിൽ സ്വതന്ത്രമായി അഴിച്ചുവിടുന്ന ഒട്ടകം.

​വസീല :

തുടർച്ചയായി പെൺകുട്ടികളെ പ്രസവിക്കുന്ന ആട്/ഒട്ടകം (പെൺകുട്ടികളുടെ ഇടയിൽ ആൺകുട്ടിയില്ലാതെ പ്രസവത്തുടർച്ച ഉണ്ടായാൽ അവയെ വിഗ്രഹങ്ങൾക്ക് നേർച്ചയാക്കും).

​ഹാം :

തന്റെ വംശത്തിൽ നിന്ന് നിശ്ചിത എണ്ണം (ഉദാഹരണത്തിന് 10) കുഞ്ഞുങ്ങൾ ജനിക്കാൻ കാരണക്കാരനായ ആൺ ഒട്ടകം. ഇതിന്റെ പുറത്ത് കയറുന്നതും സവാരി ചെയ്യുന്നതും വിലക്കി സ്വതന്ത്രമായി വിടും.

♦️​മറ്റ് മതങ്ങളുടെ സാന്നിധ്യം:

ചില പ്രദേശങ്ങളിൽ ജൂതമതം (യഥ്‌രിബ്, ഖൈബർ), ക്രൈസ്തവമതം (നജ്റാൻ, ഗസ്സാൻ), മജൂസിസം (പേർഷ്യൻ അഗ്നിയാരാധന) എന്നിവ നിലനിന്നിരുന്നെങ്കിലും അവയൊന്നും സമൂഹത്തിന് ധാർമ്മികമായ വഴി നൽകാൻ പ്രാപ്തമായിരുന്നില്ല.

♦️​സാമൂഹികമായ അവസ്ഥ (Social Condition)

​ജാഹിലിയ്യാ അറേബ്യയിലെ സാമൂഹിക ജീവിതം അനീതിയും ക്രൂരതയും അരാജകത്വവും നിറഞ്ഞതായിരുന്നു.

​സ്ത്രീകളുടെ ദയനീയ സ്ഥിതി:

​സ്ത്രീകളെ കേവലം ഒരു ഉപഭോഗവസ്തുവായാണ് അക്കാലത്ത് കണ്ടിരുന്നത്. അവൾക്ക് സ്വത്തവകാശമോ വ്യക്തിസ്വാതന്ത്ര്യമോ ഉണ്ടായിരുന്നില്ല.

​പിതാവ് മരണപ്പെട്ടാൽ മക്കൾക്ക് രണ്ടാം അമ്മമാരെ വരെ വിവാഹം കഴിക്കാവുന്ന വ്യവസ്ഥിതി ഉണ്ടായിരുന്നു.

​പരിധിയില്ലാത്ത വിവാഹ ബന്ധങ്ങളും ഒന്നിലധികം സ്ത്രീകളെ ഭാര്യമാരായി നിലനിർത്തുന്ന രീതിയും നിലനിന്നു.

♦️പെൺകുഞ്ഞുങ്ങൾ ജനിക്കുന്നത് വലിയ അപമാനമായും സാമ്പത്തിക ബാധ്യതയായും അവർ കരുതി. അതിനാൽ തന്നെ പെൺകുഞ്ഞുങ്ങളെ ജീവനോടെ കുഴിച്ചുമൂടുന്ന ക്രൂരമായ ആചാരം അറേബ്യയിലെ പല ഗോത്രങ്ങളിലും (പ്രത്യേകിച്ച് ബനൂ തമീം) വ്യാപകമായിരുന്നു.

♦️​ഗോത്രീയ മനോഭാവവും രക്തച്ചൊരിച്ചിലും:

​അറേബ്യൻ സമൂഹം ഗോത്രങ്ങളായി വിഭജിക്കപ്പെട്ടിരുന്നു. "തന്റെ സഹോദരൻ അക്രമിയായാലും അക്രമിക്കപ്പെട്ടവനായാലും അവനെ സഹായിക്കുക" എന്നതായിരുന്നു അവരുടെ അടിസ്ഥാന പ്രമാണം.

​നിസ്സാരമായ കാരണങ്ങൾക്ക് (ഉദാഹരണത്തിന് ഒട്ടകത്തെ ചൊല്ലിയോ കുതിരപ്പന്തയത്തെ ചൊല്ലിയോ) ദശാബ്ദങ്ങൾ നീണ്ടുനിൽക്കുന്ന രക്തരൂക്ഷിതമായ യുദ്ധങ്ങൾ അവർക്കിടയിൽ നടന്നു (ഉദാഹരണത്തിന്: 40 വർഷം നീണ്ടുനിന്ന ബസൂസ് യുദ്ധം, ബുആഥ് യുദ്ധം).

♦️​മദ്യവും ചൂതാട്ടവും:

മദ്യപാനവും ചൂതാട്ടവും അവരുടെ ജീവിതത്തിന്റെ ഭാഗമായിരുന്നു. കവിതകളിലൂടെയും ആഘോഷങ്ങളിലൂടെയും അവർ ഇതിനെ പുകഴ്ത്തിപ്പാടി.

♦️​അടിമത്തവും ചൂഷണവും:

അടിമകളോട് മൃഗങ്ങളേക്കാൾ ക്രൂരമായാണ് പെരുമാറിയത്.

♦️പലിശ അടിസ്ഥാനമാക്കിയുള്ള സാമ്പത്തിക ചൂഷണം വ്യാപകമായിരുന്നു; കടം വീട്ടാൻ കഴിഞ്ഞില്ലെങ്കിൽ കടക്കാരൻ അടിമയായി മാറേണ്ടി വന്നു

🕋 മുഹമ്മദ് നബി ﷺ യുടെ ജീവചരിത്രം. അധ്യായം 2 - ആനക്കലഹം, മുഹമ്മദ് നബിയുടെ ജനനവും കുട്ടിക്കാലവും.

------------------------------------------------

യമനിലെ അബ്‌സീനിയൻ (ഹബശ) വൈസ്രോയിയായിരുന്ന അബ്‌റഹത്ത് അൽ-ആശ്രം സൻആയിൽ 'അൽ-ഖുല്ലൈസ്' എന്ന പേരിൽ വിപുലവും മനോഹരവുമായ ഒരു വലിയ ക്രിസ്ത്യൻ ദേവാലയം (കതീഡ്രൽ) പണിതുയർത്തി.

 അറബികൾ കഅ്ബയിലേക്ക് തീർത്ഥാടനത്തിന് പോകുന്നത് തടയുകയും, അതിനുപകരം എല്ലാവരെയും താൻ പണിത ദേവാലയത്തിലേക്ക് ആകർഷിക്കുകയുമായിരുന്നു അവന്റെ ലക്ഷ്യം.

 ഇതറിഞ്ഞ ഒരു അറബി (കനാന ഗോത്രക്കാരൻ) രാത്രിയിൽ രഹസ്യമായി അൽ-ഖുല്ലൈസിൽ പ്രവേശിച്ച് അവിടെ അഴുക്കുകൾ വിസർജ്ജിച്ച് മലിനമാക്കി. ഇതിൽ പ്രകോപിതനായ അബ്‌റഹത്ത് കഅ്ബാലയം തകർക്കുമെന്ന് ശപഥം ചെയ്യുകയും ഒരു വലിയ സൈന്യവുമായി മക്കയിലേക്ക് പുറപ്പെടുകയും ചെയ്തു.

അബ്‌റഹത്തിന്റെ സൈന്യത്തിന് മുന്നിൽ വലിയ ആനകൾ (മഹമൂദ് എന്ന പ്രധാന ആനയടക്കം) ഉണ്ടായിരുന്നു. വഴിമധ്യേ തടയാൻ ശ്രമിച്ച ചില അറബ് ഗോത്രങ്ങളെ പരാജയപ്പെടുത്തിക്കൊണ്ട് സൈന്യം മക്കയുടെ പ്രാന്തപ്രദേശമായ 'മുഗമ്മസ്' എന്ന സ്ഥലത്തെത്തി. അബ്‌റഹത്തിന്റെ സൈന്യം പ്രവാചകന്റെ മുത്തശ്ശനും ഖുറൈശികളുടെ നേതാവുമായ അബ്ദുൽ മുത്ത്വലിബിന്റെ 200 ഒട്ടകങ്ങളെ പിടിച്ചെടുത്തു.

 അബ്ദുൽ മുത്ത്വലിബ് അബ്‌റഹത്തിനെ കാണാൻ ചെന്നപ്പോൾ അബ്‌റഹത്ത് കരുതിയത് കഅ്ബ തകർക്കരുതെന്ന് അപേക്ഷിക്കാനാണ് അദ്ദേഹം വന്നതെന്നാണ്. എന്നാൽ അബ്ദുൽ മുത്ത്വലിബ് തന്റെ ഒട്ടകങ്ങളെ തിരികെ വേണമെന്ന് മാത്രമാണ് ആവശ്യപ്പെട്ടത്.

 അബ്‌റഹത്ത് അത്ഭുതത്തോടെ ചോദിച്ചപ്പോൾ അബ്ദുൽ മുത്ത്വലിബ് പ്രഖ്യാപിച്ചു: "ഞാൻ ഈ ഒട്ടകങ്ങളുടെ ഉടമസ്ഥൻ മാത്രമാണ്. എന്നാൽ ഈ കഅ്ബാലയത്തിന് അതിനെ സംരക്ഷിക്കുന്ന മറ്റൊരു ഉടമസ്ഥനുണ്ട് (അല്ലാഹു); അവൻ അതിനെ സംരക്ഷിച്ചുകൊള്ളും."

  

അബ്ദുൽ മുത്ത്വലിബ് മക്കക്കാരോട് ശത്രുക്കളുടെ ആക്രമണത്തിൽ നിന്ന് രക്ഷപ്പെടാനായി മലനിരകളിലേക്ക് മാറിനിൽക്കാൻ കൽപ്പിക്കുകയും കഅ്ബയുടെ കവാടത്തിൽ പിടിച്ച് അല്ലാഹുവിനോട് പ്രാർത്ഥിക്കുകയും ചെയ്തു.

അബ്‌റഹത്ത് സൈന്യത്തോടും ആനകളോടും കഅ്ബ തകർക്കാനായി മക്കയിലേക്ക് മുന്നേറാൻ ഉത്തരവിട്ടു. എന്നാൽ പ്രമുഖ ആനയായ 'മഹമൂദ്' കഅ്ബയുടെ ഭാഗത്തേക്ക് നീങ്ങാൻ കൂട്ടാക്കാതെ മണ്ണിൽ മുട്ടുകുത്തി നിന്നു. യമന്റെയോ ശാമിന്റെയോ ഭാഗത്തേക്ക് തിരിച്ചാൽ അത് ഓടുമായിരുന്നു, എന്നാൽ കഅ്ബയുടെ നേരെ തിരിക്കുമ്പോൾ അത് അനങ്ങാതെ നിന്നു. അല്ലാഹു ആനയെ തടഞ്ഞ് നിർത്തി. ഇക്കാര്യം പിൽക്കാലത്ത് ഹുദൈബിയ്യാ സന്ധി വേളയിൽ പ്രവാചകൻ അനുസ്മരിച്ചത് ഹദീസിൽ കാണാം.

 പ്രവാചകന്റെ 'ഖസ്വാഅ്' എന്ന് പേരുള്ള ഒട്ടകം മുട്ടുകുത്തിയപ്പോൾ ആളുകൾ അത് വിസമ്മതിക്കുകയാണെന്ന് പറഞ്ഞു. അപ്പോൾ നബി (സ) പറഞ്ഞു:

​"ഖസ്വാഅ് വിസമ്മതിച്ചതല്ല, അത് അതിന്റെ സ്വഭാവവുമല്ല. മറിച്ച് ആനകളെ (അബ്‌റഹത്തിന്റെ പടയെ) തടഞ്ഞുനിർത്തിയവനാണ് (അല്ലാഹു) ഇതിനെയും തടഞ്ഞുനിർത്തിയത്."

(സ്വഹീഹ് അൽ-ബുഖാരി: 2731)

 

പെട്ടെന്ന് അല്ലാഹു കടലിന്റെ ഭാഗത്തുനിന്ന് കൂട്ടംകൂട്ടമായി 'അബാബീൽ' എന്ന ചെറിയ പക്ഷികളെ അയച്ചു. ഓരോ പക്ഷിയുടെ പക്കലും ചുണ്ടിലും കാലുകളിലുമായി ചെറുപയറോളമുള്ള ചുട്ടപഴുത്ത കളിമൺ കല്ലുകൾ (സജ്ജീൽ) ഉണ്ടായിരുന്നു. പക്ഷികൾ ഈ കല്ലുകൾ സൈന്യത്തിന് മേൽ വർഷിച്ചു. കല്ലു പതിച്ച ഓരോ പടയാളിയുടെയും ശരീരം ദ്രവിച്ചുപോയി. അല്ലാഹു ഖുർആനിൽ വിശേഷിപ്പിച്ചതുപോലെ അവർ "തിന്നുനശിപ്പിക്കപ്പെട്ട വൈക്കോൽ തുരുമ്പുകൾ പോലെ" (കഅസ്ഫിൻ മഅ്കൂൽ) ആയിത്തീർന്നു.

അബ്‌റഹത്തും മാരകമായി മുറിവേറ്റ് യമനിലേക്ക് ഓടി രക്ഷപ്പെടാൻ ശ്രമിച്ചെങ്കിലും വഴിമധ്യേ ശരീരം ഭാഗികമായി ദ്രവിച്ച് അത്യന്തം ദാരുണമായി മരണപ്പെട്ടു.

ഈ അത്ഭുത സംഭവത്തെ ഓർമ്മിപ്പിച്ചുകൊണ്ട് അല്ലാഹു അവതരിപ്പിച്ച അധ്യായമാണ് സൂറത്തുൽ ഫീൽ (105):

 "ആനക്കാരോട് നിന്റെ രക്ഷിതാവ് ചെയ്തത് എങ്ങനെയെന്ന് നീ കണ്ടില്ലേ? അവരുടെ തന്ത്രത്തെ അവൻ പാഴാക്കിയില്ലേ? കൂട്ടം കൂട്ടമായി പക്ഷികളെ അവൻ അവരുടെ നേർക്ക് അയക്കുകയും ചെയ്തു. ചുട്ട കളിമൺ കല്ലുകൾ അവരിലേക്ക് എറിയുന്നവരായ. അങ്ങനെ അവരെ അവൻ തിന്നൊടുക്കപ്പെട്ട വൈക്കോൽ പോലെയാക്കി."

 ഈ സംഭവത്തോടെ അറബികൾക്കിടയിൽ കഅ്ബയോടും അത് പരിപാലിക്കുന്ന ഖുറൈശികളോടുമുള്ള ആദരവും ബഹുമാനവും ഇരട്ടിക്കുകയും ചെയ്തു.

ഈ ചരിത്രസംഭവം നടന്ന വർഷത്തിലാണ് (ക്രിസ്തുവർഷം 571) പ്രവാചകൻ (സ) ജനിച്ചത്. ഈ വർഷം അറബികൾക്കിടയിൽ 'ആമുൽ ഫീൽ' (ആനക്കലാപ വർഷം) എന്ന പേരിൽ അറിയപ്പെട്ടു

ഖുറൈശി ഗോത്രത്തിലെ ബനൂ ഹാശിം കുടുംബത്തിലാണ് പ്രവാചകൻ (സ) ജനിച്ചത്. പിതാവ്: അബ്ദുല്ല ബിൻ അബ്ദിൽ മുത്ത്വലിബ്. 

മാതാവ്: ആമിന ബിൻത് വഹ്ബ് (ഖുറൈശികളിലെ ബനൂ സുഹ്‌റ ഗോത്രത്തലവന്റെ മകൾ).

വാസിലത് ബിൻ അൽ-അസ്ഖ (റ) നിവേദനം : ​നബി (സ) പറഞ്ഞു:

"അല്ലാഹു ഇബ്രാഹീം നബിയുടെ മക്കളിൽ നിന്ന് ഇസ്മായിലിനെ (അ) തിരഞ്ഞെടുത്തു. ഇസ്മായിലിന്റെ മക്കളിൽ നിന്ന് കിനാന ഗോത്രത്തെ തിരഞ്ഞെടുത്തു. കിനാനയിൽ നിന്ന് ഖുറൈഷികളെ തിരഞ്ഞെടുത്തു. ഖുറൈഷികളിൽ നിന്ന് ഹാശിം കുടുംബത്തെ തിരഞ്ഞെടുത്തു. ഹാശിം കുടുംബത്തിൽ നിന്ന് എന്നെയും തിരഞ്ഞെടുത്തു."

(സ്വഹീഹ് മുസ്ലിം: 2276)

 പ്രവാചകൻ (സ) മാതാവിന്റെ ഗർഭത്തിലായിരിക്കുമ്പോൾ തന്നെ പിതാവ് അബ്ദുല്ല സിറിയൻ കച്ചവടയാത്ര കഴിഞ്ഞ് മടങ്ങവേ യഥ്‌രിബിൽ (മദീന) വെച്ച് രോഗബാധിതനായി മരണപ്പെട്ടു.

 ജനനവാർത്ത അറിഞ്ഞ പിതാമഹൻ അബ്ദുൽ മുത്ത്വലിബ് കുഞ്ഞിനെ കഅ്ബയിലേക്ക് കൊണ്ടുപോയി അല്ലാഹുവിന് നന്ദി അർപ്പിക്കുകയും, അറബികൾക്കിടയിൽ അപൂർവ്വമായിരുന്ന 'മുഹമ്മദ്' (ഏറെ സ്തുതിക്കപ്പെട്ടവൻ) എന്ന പേര് നൽകുകയും ചെയ്തു.

അറബികളുടെ ആചാരപ്രകാരം കുട്ടികൾക്ക് ശുദ്ധമായ അറബി ഭാഷയും ആരോഗ്യമുള്ള ശരീരപ്രകൃതിയും ലഭിക്കുന്നതിനായി മരുഭൂമിയിലെ ഗോത്രങ്ങളിലേക്ക് മുലയൂട്ടാനും വളർത്താനുമായി അയക്കാറുണ്ടായിരുന്നു.

 മാതാവിന് ശേഷം അബൂലഹബിന്റെ അടിമസ്ത്രീയായ ഥുവൈബ പ്രവാചകന് മുലപ്പാൽ നൽകി. പിന്നിട് ബനൂ സഅ്ദ് ഗോത്രക്കാരിയായ ഹലീമ ബിൻത് അബീ ദുവൈബ് കുഞ്ഞിനെ ഏറ്റെടുത്തു. ഹലീമയുടെ വീട്ടിൽ പ്രവാചകൻ എത്തിയതോടെ അവരുടെ ജീവിതത്തിലും ആടുകളിലും വലിയ അനുഗ്രഹവും (ബറക്കത്ത്) സമൃദ്ധിയും വന്നുചേർന്നു.

പ്രവാചകന് നാല് വയസ്സുള്ളപ്പോൾ പ്രവാചകൻ (സ) മറ്റ് കുട്ടികളോടൊപ്പം കളിച്ചുകൊണ്ടിരിക്കുമ്പോൾ ജിബ്‌രീൽ (അ) പ്രത്യക്ഷപ്പെട്ടു.

​ജിബ്‌രീൽ (അ) പ്രവാചകനെ കിടത്തി നെഞ്ച് പിളർന്ന് ഹൃദയം പുറത്തെടുത്തു. ​ഹൃദയത്തിൽ നിന്ന് ഒരു രക്തക്കട്ട പുറത്തെടുത്തുകൊണ്ട് ജിബ്‌രീൽ (അ) പറഞ്ഞു: "ഇത് നിന്നിലുള്ള പിശാചിന്റെ വിഹിതമാകുന്നു (ഹദ്ദുക മിനശ്ശൈത്വാൻ)."

​തുടർന്ന് ആ ഹൃദയം ഒരു സ്വർണ്ണപ്പാത്രത്തിൽ വെച്ച് സംസം വെള്ളത്താൽ കഴുകി വിശുദ്ധീകരിക്കുകയും, അത് പഴയപടി ഉറപ്പിച്ചു വെച്ച് നെഞ്ച് കൂട്ടിച്ചേർക്കുകയും ചെയ്തു.

​

 ഇരച്ചെത്തിയ കുട്ടികൾ ഭയന്ന് ഹലീമയുടെ അടുത്തേക്ക് ഓടിച്ചെന്ന് "മുഹമ്മദ് കൊല്ലപ്പെട്ടു" എന്ന് പറഞ്ഞു. അവർ ഓടിയെത്തിയപ്പോൾ ഭയന്നുവിറച്ച് നിൽക്കുന്ന കുട്ടിയെയാണ് കണ്ടത്.

അനസ് ബിൻ മാലിക് (റ) വിൽ നിന്ന് നിവേദനം:

​"പ്രവാചകൻ (സ) കുട്ടികളോടൊപ്പം കളിച്ചുകൊണ്ടിരിക്കുമ്പോൾ ജിബ്‌രീൽ (അ) അവിടുത്തെ അടുക്കൽ വന്നു. ജിബ്‌‌രീൽ (അ) അവിടുത്തെ പിടിച്ച് നിലത്തു കിടത്തുകയും, നെഞ്ച് പിളർന്ന് ഹൃദയം പുറത്തെടുക്കുകയും ചെയ്തു. തുടർന്ന് അതിൽ നിന്ന് ഒരു രക്തക്കട്ട പുറത്തെടുത്തിട്ട് പറഞ്ഞു: 'ഇത് നിന്നിലുള്ള പിശാചിന്റെ ഓഹരി (ഭാഗം) ആകുന്നു.'

​പിന്നീട് സ്വർണ്ണത്തിന്റെ ഒരു പാത്രത്തിൽ സംസം വെള്ളം ഉപയോഗിച്ച് ആ ഹൃദയം കഴുകി, തുന്നിച്ചേർത്ത് (പൂർവ്വസ്ഥിതിയിലാക്കി) അതിന്റെ സ്ഥാനത്തുതന്നെ തിരികെ വെച്ചു.

​(ഇതുകണ്ട് പരിഭ്രാന്തരായ) കുട്ടികൾ അവിടുത്തെ ഉമ്മയുടെ - അതായത് വളർത്തുമാതാവായ ഹലീമയുടെ - അടുക്കലേക്ക് ഓടിച്ചെന്ന് പറഞ്ഞു: 'മുഹമ്മദ് കൊല്ലപ്പെട്ടിരിക്കുന്നു!'

​അവർ അവിടുത്തെ അടുത്തേക്ക് വന്നപ്പോൾ, ഭയം കാരണം വിവർണ്ണനായ (നിറം മങ്ങിയ) മുഖത്തോടെ നിൽക്കുന്ന പ്രവാചകനെയാണ് കണ്ടത്."

​(നിവേദകനായ അനസ് (റ) പറയുന്നു: "അവിടുത്തെ നെഞ്ചിൽ ആ തുന്നിച്ചേർത്ത അടയാളത്തിന്റെ വടുക്കൾ ഞാൻ കണ്ടിട്ടുണ്ട്.") സ്വഹീഹ് മുസ്ലിം 162.

 ഈ സംഭവത്തിൽ ഭയന്ന ഹലീമ കുട്ടിയെ മാതാവായ ആമിനയുടെ അടുക്കലേക്ക് തിരികെ ഏൽപ്പിച്ചു.

 ആറാം വയസ്സിൽ മാതാവ് ആമിന കുഞ്ഞിനെയും കൂട്ടി ഭർത്താവ് അബ്ദുല്ലയുടെ ഖബറിടം സന്ദർശിക്കാൻ മദീനയിലേക്ക് പോയി. മടക്കയാത്രയിൽ 'അബ്‌വാഇൽ' വെച്ച് മാതാവ് ഗുരുതരമായി രോഗബാധിതയായി മരണപ്പെട്ടു. ഈ സമയത്ത് ആറു വയസ്സുകാരനായ പ്രവാചകനെ ആശ്വസിപ്പിക്കുകയും കയ്യിലെടുത്ത് മക്കയിലെത്തിച്ച് പിതാമഹൻ അബ്ദുൽ മുത്ത്വലിബിനെ ഏൽപ്പിക്കുകയും ചെയ്തത് ദാസിയായ ഉമ്മു അയ്മൻ ആയിരുന്നു.

 മാതാവിന്റെ മരണശേഷം മുത്തശ്ശൻ അബ്ദുൽ മുത്ത്വലിബ് പ്രവാചകനെ അളവറ്റ വാത്സല്യത്തോടെ സംരക്ഷിച്ചു. എന്നാൽ എട്ടാം വയസ്സിൽ അബ്ദുൽ മുത്ത്വലിബും മരണമടഞ്ഞു.

🕋മുഹമ്മദ് നബി ﷺ യുടെ ജീവചരിത്രം. അധ്യായം 3.

കൗമാരം - അബൂത്വാലിബിന്റെ സംരക്ഷണത്തിൽ.

------------------------------------------------

അബ്ദുൽ മുത്ത്വലിബിന്റെ മരണശേഷം പിതൃവ്യനായ അബൂത്വാലിബ് പ്രവാചകന്റെ സംരക്ഷണം ഏറ്റെടുത്തു. സ്വന്തം മക്കളേക്കാൾ സ്നേഹത്തോടെയും മുൻഗണന നൽകിയുമാണ് അബൂത്വാലിബ് പ്രവാചകനെ വളർത്തിയത്.

പ്രവാചകൻ (സ) ചെറുപ്പത്തിൽ അബൂത്വാലിബിന്റെ സംരക്ഷണത്തിൽ വളരുന്ന കാലഘട്ടം. മക്കയിൽ കഠിനമായ വരൾച്ചയും ക്ഷാമവും ബാധിച്ചു. മഴ പെയ്യാതെ ജനങ്ങളും മൃഗങ്ങളും കഷ്ടപ്പെടുകയും കൃഷികളെല്ലാം ഉണങ്ങി നശിക്കുകയും ചെയ്തു.

നിസ്സഹായരായ ഖുറൈശികൾ അബൂത്വാലിബിന്റെ അടുക്കൽ ചെന്ന് പറഞ്ഞു: "അബൂത്വാലിബ്, താഴ്‌വരകൾ വരണ്ടുണങ്ങിയിരിക്കുന്നു, ജനങ്ങൾ നശിക്കുകയാണ്. അതിനാൽ താങ്കൾ മുന്നോട്ടുവന്ന് ഞങ്ങൾക്ക് വേണ്ടി മഴയ്ക്കായി പ്രാർത്ഥിച്ചാലും."

അബൂത്വാലിബ് ജനങ്ങളോടൊപ്പം കഅ്ബയുടെ അരികിലേക്ക് ഇറങ്ങിവന്നു. അന്ന് പൗർണ്ണമി ചന്ദ്രനെപ്പോലെ തിളങ്ങുന്ന മുഖമുള്ള ഒരു കൊച്ചുകുട്ടിയും അബൂത്വാലിബിന്റെ കൂടെയുണ്ടായിരുന്നു. അത് പ്രവാചകൻ മുഹമ്മദ് (സ) ആയിരുന്നു.

 അബൂത്വാലിബ് ആ കുട്ടിയെ കൂട്ടി കഅ്ബയുടെ ഭിത്തിയോട് ചേർന്നുനിന്നു. തന്റെ വിരലിൽ പിടിച്ച് ചേർത്തുനിർത്തുകയും അവിടുത്തെ ബറക്കത്ത് മുൻനിർത്തി അല്ലാഹുവോട് പ്രാർത്ഥിക്കുകയും ചെയ്തു.

ആ സമയത്ത് ആകാശത്ത് ഒരു തുള്ളി മേഘം പോലും ഉണ്ടായിരുന്നില്ല.

അബൂത്വാലിബ് പ്രവാചകനെ മുന്നിൽ നിർത്തി പ്രാർത്ഥിച്ച് നിമിഷങ്ങൾക്കകം, ആകാശത്തിന്റെ നാലുപാടത്തുനിന്നും മേഘങ്ങൾ ഒന്നിച്ചുകൂടുകയും മക്കയിൽ ശക്തമായ മഴ പെയ്യാൻ തുടങ്ങുകയും ചെയ്തു.

വരണ്ടുണങ്ങിയിരുന്ന താഴ്‌വരകളിലൂടെ വെള്ളമൊഴുകുകയും ജനങ്ങളുടെയും മൃഗങ്ങളുടെയും ദാഹം ശമിക്കുകയും ദാരിദ്ര്യം നീങ്ങുകയും ചെയ്തു. ചെറുപ്പത്തിൽ തന്നെ പ്രവാചകന് അല്ലാഹു നൽകിയ അനുഗ്രഹവും പദവിയും വ്യക്തമാക്കുന്നതായിരുന്നു ഈ സംഭവം.

വർഷങ്ങൾക്ക് ശേഷം, പ്രവാചകത്വത്തിന് ശേഷം ഖുറൈശികൾ പ്രവാചകനെ ഉപദ്രവിക്കാനും ബഹിഷ്കരിക്കാനും (ശിഅ്ബ് അബീത്വാലിബ്) തുടങ്ങിയപ്പോൾ അബൂത്വാലിബ് പാടിയ പ്രശസ്തമായ ലാമിയ്യ കവിതയിൽ ഈ സംഭവം അനുസ്മരിക്കുന്നുണ്ട്: وَأَبْيَضَ يُسْتَسْقَى الْغَمَامُ بِوَجْهِهِ ... ثِمَالُ الْي عِصْمَةٌ لِلْأَرَامِلِ

"അവിടുന്ന് വെളുത്ത ശോഭയുള്ള മുഖമുള്ളവനാണ്, അവിടുത്തെ മുഖം മുൻനിർത്തിയാണ് ആകാശത്തുനിന്ന് മേഘങ്ങളോട് മഴ ചോദിക്കപ്പെടുന്നത്. അവിടുന്ന് അനാഥരുടെ അഭയകേന്ദ്രവും വിധവകളുടെ സംരക്ഷകനുമാകുന്നു"

ഈ സംഭവം പിൽക്കാലത്ത് അബ്ദുല്ലാഹിബ്നു ഉമർ ഓർക്കുന്നത് ബുഖാരിയിൽ കാണാം.

അബ്ദുള്ളാഹിബ്നു ഉമർ (റ) വിൽ നിന്ന് നിവേദനം:

​"പ്രവാചകൻ (സ) (മിമ്പറിലിരുന്ന് ജനങ്ങൾക്ക്) മഴയ്ക്കായി പ്രാർത്ഥിക്കുന്നത് നോക്കിനിൽക്കെ, അവിടുത്തെ പരിശുദ്ധമായ മുഖത്തേക്ക് നോക്കുമ്പോൾ (അബൂത്വാലിബ് എന്ന) കവി പാടിയ വരികൾ പലപ്പോഴും എന്റെ ഓർമ്മയിൽ വരാറുണ്ടായിരുന്നു. അവിടുന്ന് പ്രാർത്ഥിച്ച് ഇറങ്ങുന്നതിന് മുൻപ് തന്നെ ശക്തമായ മഴ പെയ്ത് മക്കയിലെ എല്ലാ അരുവികളിലും വെള്ളം കവിഞ്ഞൊഴുകുമായിരുന്നു.

​(ആ വരികൾ ഇതായിരുന്നു:)

'അവിടുന്ന് വെളുത്ത ശോഭയുള്ള മുഖമുള്ളവനാണ്, അവിടുത്തെ മുഖം മുൻനിർത്തിയാണ് ആകാശത്തുനിന്ന് മേഘങ്ങളോട് മഴ ചോദിക്കപ്പെടുന്നത്. അവിടുന്ന് അനാഥരുടെ അഭയകേന്ദ്രവും വിധവകളുടെ സംരക്ഷകനുമാകുന്നു.'

​ഇത് അബൂത്വാലിബ് പറഞ്ഞ വരികളാണ്. (സ്വഹീഹുൽ ബുഖാരി:1008)

പ്രവാചകൻ (സ) ക്ക് 12 വയസ്സുള്ളപ്പോൾ പിതൃവ്യനായ അബൂത്വാലിബിനോടൊപ്പം വ്യാപാരാവശ്യത്തിനായി സിറിയയിലേക്ക് നടത്തിയ യാത്രയിൽ ഒരു അത്ഭുത സംഭവം ഉണ്ടായി.

അബൂമൂസൽ അശ്അരി (റ) വിൽ നിന്ന് നിവേദനം:

​"അബൂത്വാലിബ് ഖുറൈശികളിലെ ചില പ്രമുഖരോടൊപ്പം ശാമിലേക്ക് (സിറിയ) പുറപ്പെട്ടു. പ്രവാചകൻ (സ) യും അവരോടൊപ്പം ഉണ്ടായിരുന്നു. അവർ (ക്രൃസ്ത്യൻ) പാതിരിയുടെ (ബഹീറയുടെ) ആശ്രമത്തിനടുത്തെത്തിയപ്പോൾ വാഹനം ഇറങ്ങുകയും ഒട്ടകങ്ങളുടെ കെട്ടുകൾ അഴിക്കുകയും ചെയ്തു.

​മുൻപൊക്കെ ഖുറൈശികൾ അദ്ദേഹത്തിന്റെ അരികിലൂടെ കടന്നുപോകാറുണ്ടായിരുന്നെങ്കിലും അദ്ദേഹം പുറത്തേക്ക് വരികയോ അവരെ ശ്രദ്ധിക്കുകയോ ചെയ്യാറില്ലായിരുന്നു. എന്നാൽ ഇത്തവണ ഒട്ടകങ്ങളുടെ കെട്ടുകളഴിക്കുന്ന ആളുകൾക്കിടയിലൂടെ നടന്ന് പാതിരി വരികയും, പ്രവാചകൻ (സ) യുടെ കൈ പിടിച്ച് ഇപ്രകാരം പ്രഖ്യാപിക്കുകയും ചെയ്തു:

​'ഇദ്ദേഹം ലോകരക്ഷിതാവിന്റെ ദൂതനാണ്! ഇദ്ദേഹത്തെ ലോകർക്ക് കാരുണ്യമായിക്കൊണ്ട് അല്ലാഹു നിയോഗിക്കുന്നതാണ്.'

​അപ്പോൾ ഖുറൈശി പ്രമുഖർ ചോദിച്ചു: 'നിനക്ക് ഇതെങ്ങനെ മനസ്സിലായി?'

​ബഹീറ പറഞ്ഞു: 'നിങ്ങൾ മലഞ്ചെരിവിൽ നിന്ന് ഇറങ്ങിവരുമ്പോൾ ഇദ്ദേഹത്തിന് സാഷ്ടാംഗം (സുജൂദ്) ചെയ്യാത്തതായി ഒരു കല്ലോ മരമോ ഉണ്ടായിരുന്നില്ല. ഒരു പ്രവാചകനല്ലാതെ അവ സാഷ്ടാംഗം ചെയ്യുകയില്ല. കൂടാതെ, അവിടുത്തെ തോളെല്ലിന് താഴെ ആപ്പിൾ പഴത്തിന്റെ വലിപ്പത്തിലുള്ള പ്രവാചകത്വ മുദ്ര (ഖാതമുന്നുബുവ്വ) ഉള്ളതായി ഞങ്ങളുടെ ഗ്രന്ഥങ്ങളിൽ നിന്ന് ഞങ്ങൾ തിരിച്ചറിയുന്നുണ്ട്.'

​തുടർന്ന് അദ്ദേഹം മടങ്ങിപ്പോയി അവർക്കായി ഭക്ഷണം തയ്യാറാക്കി. അത് കൊണ്ടുവന്നപ്പോൾ പ്രവാചകൻ (സ) ഒട്ടകങ്ങളെ മേയിക്കാൻ പോയിരിക്കുകയായിരുന്നു. പാതിരി പറഞ്ഞു: 'അവിടുത്തെ വിളിച്ചുകൊണ്ടുവരൂ.' പ്രവാചകൻ (സ) വന്നപ്പോൾ ഒരു മേഘതണൽ അവിടുത്തേക്ക് തണലിടുന്നുണ്ടായിരുന്നു. ജനങ്ങളിലേക്ക് അടുത്തപ്പോൾ അവർ മരത്തണലിലേക്ക് കയറി ഇരുന്നിട്ടുണ്ടായിരുന്നു. എന്നാൽ പ്രവാചകൻ (സ) ഇരുന്നപ്പോൾ മരത്തിന്റെ തണൽ അവിടുത്തെ ഭാഗത്തേക്ക് ചരിഞ്ഞു കൊടുത്തു. പാതിരി പറഞ്ഞു: 'നോക്കൂ, മരത്തിന്റെ തണൽ അവിടുത്തേക്ക് ചരിഞ്ഞു കൊടുത്തിരിക്കുന്നു!'

​തുടർന്ന് അദ്ദേഹം അവർക്ക് മുന്നിൽ നിൽക്കുമ്പോൾ, പ്രവാചകനെ റൂമികളുടെ (റോമാക്കാരുടെയും ജൂതന്മാരുടെയും) അടുത്തേക്ക് കൊണ്ടുപോകരുതെന്ന് അവരോട് ശക്തമായി ആവശ്യപ്പെട്ടുകൊണ്ടിരുന്നു. കാരണം റോമാക്കാർ ഇദ്ദേഹത്തെ കണ്ടാൽ വേദഗ്രന്ഥങ്ങളിലെ അടയാളങ്ങൾ വച്ച് തിരിച്ചറിയുകയും വധിക്കാൻ ശ്രമിക്കുകയും ചെയ്യും.

​അതിനിടയിൽ റോമിൽ നിന്ന് വന്ന ഏഴ് ആളുകൾ അവിടേക്ക് പ്രവേശിക്കുന്നത് ബഹീറ കണ്ടു. അദ്ദേഹം മുന്നോട്ടുചെന്ന് അവരോട് ചോദിച്ചു: 'നിങ്ങൾ എന്തിനാണ് വന്നത്?' അവർ പറഞ്ഞു: 'ഈ മാസത്തിൽ വരാനിരിക്കുന്ന ഒരു പ്രവാചകൻ പുറപ്പെടുന്ന വിവരം ലഭിച്ചിട്ടുണ്ട്. അതുകൊണ്ട് എല്ലാ വഴികളിലേക്കും ആളുകളെ അയച്ചിട്ടുണ്ട്. ഞങ്ങൾക്ക് ഈ വഴിയിലൂടെ വിവരം ലഭിച്ചതുകൊണ്ടാണ് ഞങ്ങൾ വന്നത്.'

​ബഹീറ ചോദിച്ചു: 'നിങ്ങൾക്ക് പിന്നിൽ നിങ്ങളേക്കാൾ മികച്ച ആരെങ്കിലും വരാനുണ്ടോ?' അവർ പറഞ്ഞു: 'ഇല്ല, ഈ വഴിയിലൂടെയുള്ള വിവരം ലഭിച്ചതിനാലാണ് ഞങ്ങൾ വന്നത്.' ബഹീറ ചോദിച്ചു: 'അല്ലാഹു നടപ്പിലാക്കാൻ ഉദ്ദേശിച്ച ഒരു കാര്യത്തെ തടുക്കാൻ ഏതെങ്കിലും മനുഷ്യന് സാധിക്കുമോ?' അവർ പറഞ്ഞു: 'ഇല്ല.' അങ്ങനെ അവർ ബഹീറയോട് കരാർ ചെയ്യുകയും അദ്ദേഹത്തോടൊപ്പം അവിടെ തങ്ങുകയും ചെയ്തു.

​തുടർന്ന് ബഹീറ ഖുറൈശികളോട് അല്ലാഹുവിന്റെ നാമത്തിൽ ചോദിച്ചു: 'ആരാണ് ഈ കുട്ടിയുടെ രക്ഷിതാവ്?' അവർ പറഞ്ഞു: 'അബൂത്വാലിബ്.' ബഹീറ നിർബന്ധപൂർവ്വം ഉപദേശിച്ചതിനെ തുടർന്ന് അബൂത്വാലിബ് കുട്ടിയെ മക്കയിലേക്ക് തിരികെ അയച്ചു."

(​ഇമാം ഹാകിം: അൽ-മുസ്തദ്‌റക് (2/615) . സ്വഹീഹ് പറഞ്ഞു

​ഇമാം ദഹബി അൽ-മുസ്തദ്‌റകിന്റെ തൽഖീസിൽ ഇതിന്റെ പ്രാമാണികത സ്ഥിരീകരിച്ചിട്ടുണ്ട്.)

 "കച്ചവട സംഘത്തിലുള്ളവർ ഭക്ഷണം കഴിച്ചുകൊണ്ടിരിക്കുമ്പോൾ ബഹീറ നബി (സ) യെത്തന്നെ നിരീക്ഷിച്ചുകൊണ്ടിരിക്കുകയായിരുന്നു. അവിടുത്തെ ശരീരത്തിലെ അടയാളങ്ങളും ലക്ഷണങ്ങളും താൻ വേദഗ്രന്ഥങ്ങളിൽ വായിച്ചറിഞ്ഞതുപോലെത്തന്നെയാണോ എന്ന് അദ്ദേഹം പരിശോധിക്കുകയായിരുന്നു.

​ഭക്ഷണം കഴിച്ചു കഴിഞ്ഞതിനുശേഷം ബഹീറ പ്രവാചകൻ (സ) യുടെ അരികിലെത്തി ഇപ്രകാരം പറഞ്ഞു:

​'കുട്ടീ, ലാതയുടെയും ഉസ്സയുടെയും നാമത്തിൽ ഞാൻ നിന്നോട് ചോദിക്കുന്ന കാര്യങ്ങൾക്ക് നീ സത്യസന്ധമായി മറുപടി നൽകണം!'

​(കാരണം ഖുറൈശികൾ തങ്ങളുടെ ദൈവങ്ങളായ ലാതയുടെയും ഉസ്സയുടെയും നാമത്തിൽ സത്യം ചെയ്യുന്നത് കണ്ടാണ് ബഹീറ അങ്ങനെ ചോദിച്ചത്).

​അപ്പോൾ പ്രവാചകൻ (സ) അവിടുത്തെ ജീവിതത്തിൽ ആദ്യമായി ബഹീറയോട് മറുപടി പറഞ്ഞു:

​'ലാതയുടെയും ഉസ്സയുടെയും നാമത്തിൽ എന്നോട് ഒന്നും ചോദിക്കരുത്! അല്ലാഹുവാണ സത്യം, ഈ രണ്ടെണ്ണത്തിനോളം എനിക്ക് വെറുപ്പുള്ള മറ്റൊന്നുമില്ല!'

​അപ്പോൾ ബഹീറ പറഞ്ഞു: 'എങ്കിൽ അല്ലാഹുവിന്റെ നാമത്തിൽ ഞാൻ ചോദിക്കുന്നതിന് നീ മറുപടി തരണം.'

​പ്രവാചകൻ (സ) പറഞ്ഞു: 'നിനക്ക് ഇഷ്ടമുള്ളത് ചോദിച്ചുകൊള്ളുക.'

​തുടർന്ന് ബഹീറ പ്രവാചകന്റെ ഉറക്കം, ഭക്ഷണ രീതികൾ, ദിനചര്യകൾ എന്നിവയെക്കുറിച്ച് ചോദിക്കുകയും പ്രവാചകൻ മറുപടി നൽകുകയും ചെയ്തു. അത് വേദഗ്രന്ഥങ്ങളിൽ ബഹീറ വായിച്ചറിഞ്ഞ ലക്ഷണങ്ങളോട് പൂർണ്ണമായും ഒത്തുപോകുന്നതായിരുന്നു. അതിനുശേഷം പ്രവാചകന്റെ മുതുകിലേക്ക് നോക്കിയ ബഹീറ, രണ്ടു തോളെല്ലുകൾക്കിടയിൽ പ്രവാചകത്വ മുദ്ര (ഖാതമുന്നുബുവ്വ) കാണുകയും ചെയ്തു.

നബിയുടെ ശരീരത്തിലെ ലക്ഷണങ്ങൾ പരിശോധിച്ചു കഴിഞ്ഞ ശേഷം ബഹീറ അബൂത്വാലിബിന്റെ അടുക്കലേക്ക് ചെന്ന് ചോദിച്ചു:

​'ഈ കുട്ടിക്ക് നിന്നോടുള്ള ബന്ധമെന്താണ്?'

​അബൂത്വാലിബ് പറഞ്ഞു: 'ഇവൻ എന്റെ മകനാണ്.'

​അപ്പോൾ ബഹീറ പറഞ്ഞു: 'ഇവൻ നിന്റെ മകനല്ല! ഈ കുട്ടിയുടെ പിതാവ് ജീവിച്ചിരിക്കാൻ സാധ്യതയില്ല (അവന്റെ പിതാവ് ജീവിച്ചിരിക്കുന്നവനാവാൻ പാടില്ല).'

​അപ്പോൾ അബൂത്വാലിബ് പറഞ്ഞു: 'ഇവൻ എന്റെ സഹോദരന്റെ മകനാണ് (ജ്യേഷ്ഠന്റെ/അനുജന്റെ മകനാണ്).'

​ബഹീറ ചോദിച്ചു: 'അവന്റെ പിതാവിന് എന്താണ് സംഭവിച്ചത്?'

​അബൂത്വാലിബ് പറഞ്ഞു: 'ഈ കുട്ടി ഉമ്മയുടെ വയറ്റിൽ ഗർഭസ്ഥനായിരിക്കെ തന്നെ അവന്റെ പിതാവ് മരണപ്പെട്ടതാണ്.'

​ബഹീറ പറഞ്ഞു: 'നീ പറഞ്ഞത് സത്യമാണ്! അതിനാൽ നിന്റെ സഹോദരപുത്രനെയും കൊണ്ട് നീ സ്വന്തം നാട്ടിലേക്ക് മടങ്ങുക. ജൂതന്മാരിൽ നിന്നും റൂമികളിൽ നിന്നും ഇവനെ സൂക്ഷിക്കുക. അല്ലാഹുവാണെ സത്യം, അവർ ഇവനെ കാണുകയും ഞാൻ തിരിച്ചറിഞ്ഞ ഈ കാര്യങ്ങൾ മനസ്സിലാക്കുകയും ചെയ്താൽ അവർ ഇവനെ ഉപദ്രവിക്കാൻ ശ്രമിക്കും. കാരണം നിന്റെ ഈ സഹോദരപുത്രന് ഭാവിയിൽ വലിയൊരു പദവിയുണ്ടാകാനിരിക്കുന്നുണ്ട്"

​സീറത്തു ഇബ്നി ഹിശാം (Seerah Ibn Hisham): വാല്യം 1, പേജ് 180-183.

🕋മുഹമ്മദ് നബി ﷺ യുടെ ജീവചരിത്രം. അധ്യായം 4. 

യൗവനം - ആട് മേയ്ക്കലും തിന്മകളിൽ നിന്നും അല്ലാഹുവിൻറെ കാവലും

-----------------------------------------------------------

♦️പിതൃവ്യനായ അബൂത്വാലിബ് സാമ്പത്തികമായി വലിയ പ്രയാസം അനുഭവിച്ചിരുന്ന ആളായിരുന്നു. വലിയ കുടുംബത്തെ പുലർത്താൻ അദ്ദേഹം പാടുപെടുന്നത് കണ്ട പ്രവാചകൻ (സ) തൻറെ ചെറിയ പ്രായത്തിൽ തന്നെ അദ്ദേഹത്തെ സഹായിക്കാനായി ആടുകളെ മേയ്ക്കാൻ ഇറങ്ങിത്തിരിച്ചു.

 പിൽക്കാലത്ത് പ്രവാചകൻ ﷺ പ്രസ്താവിച്ചതായി ഹദീസിൽ കാണാം: "അല്ലാഹു നിയോഗിച്ച ഒരു പ്രവാചകനും ആടുകളെ മേയിക്കാതിരുന്നിട്ടില്ല."

 അപ്പോൾ സ്വഹാബികൾ ചോദിച്ചു: "അല്ലാഹുവിന്റെ ദൂതരേ, താങ്കളുമോ?"

അവിടുന്ന് മറുപടി പറഞ്ഞു: "അതെ, ഞാൻ മക്കക്കാർക്ക് വേണ്ടി കുറഞ്ഞ കൂലിക്ക് (ഖീറാത്വുകൾക്ക്) ആടുകളെ മേയിച്ചു കൊടുക്കാറുണ്ടായിരുന്നു." (സ്വഹീഹുൽ ബുഖാരി 2262)

♦️പ്രവാചകന്മാരെ തെരഞ്ഞെടുക്കുമ്പോൾ അല്ലാഹു അവർക്ക് നൽകുന്ന ഒരു പ്രധാന പരിശീലനമായിരുന്നു ആട് മേയ്ക്കൽ എന്ന് പണ്ഡിതന്മാർ ചൂണ്ടിക്കാണിക്കുന്നു. ആടുകളെ മേയ്ക്കുന്നതിലൂടെ പ്രവാചകനിൽ ചില പ്രധാന ഗുണങ്ങൾ രൂപപ്പെട്ടു:

 

വഴിതെറ്റിപ്പോകുന്നതും അനുസരണക്കേട് കാണിക്കുന്നതുമായ ആടുകളെ ക്ഷമയോടെ കൂട്ടി മനസ്സിലാക്കി നയിക്കാൻ വലിയ ക്ഷമ ആവശ്യമാണ്. ഇത് പിന്നീട് വാശിപിടിക്കുന്ന ജനങ്ങളെ പ്രബോധനത്തിലൂടെ നേർവഴിയിലാക്കാൻ സഹായിച്ചു.

♦️​ആടുകളെ മേയിക്കുന്ന പ്രകൃതം മനുഷ്യരിൽ ഉണ്ടാക്കുന്ന സ്വഭാവ മാറ്റങ്ങളെക്കുറിച്ച് പ്രവാചകൻ (സ) എടുത്തുപറഞ്ഞിട്ടുണ്ട്. സ്വഹീഹ് ബുഖാരിയിലും സ്വഹീഹ് മുസ്ലിമിലും (ഹദീസ് നമ്പർ: 52) വന്ന നിവേദനം:

​പ്രവാചകൻ (സ) പറഞ്ഞു: "അഹങ്കാരവും ഉച്ചത്തിലുള്ള സംസാരവും ഒട്ടക ഉടമസ്ഥരിലാണ് കാണപ്പെടുക. എന്നാൽ ശാന്തതയും സൗമ്യതയും ആടുമേയിക്കുന്നവരിലാണ് ഉള്ളത്."

 ♦️വിനയവും ലാളിത്യവും : അക്കാലത്ത് ആട് മേയ്ക്കൽ സമൂഹം താഴ്ന്ന തൊഴിലായാണ് കണ്ടിരുന്നത്. അതുകൊണ്ടുതന്നെ പ്രവാചകനിൽ അഹങ്കാരമോ ദാർഷ്ട്യമോ കടന്നുവരാതെ പൂർണ്ണ വിനയം വളരാൻ ഇത് കാരണമായി.

  ♦️നേതൃത്വപാടവവും സംരക്ഷണവും : ആടുകളെ ചെന്നായ്ക്കളിൽ നിന്നും മറ്റ് വന്യമൃഗങ്ങളിൽ നിന്നും സംരക്ഷിക്കേണ്ടതുണ്ടായിരുന്നു. ഇത് ജനങ്ങളുടെ ആത്മീയവും ഭൗതികവുമായ സുരക്ഷ ഉറപ്പാക്കുന്ന നായകനായി മാറാൻ പ്രവാചകനെ പ്രാപ്തനാക്കി.

 ♦️ഏകാന്തചിന്തയും ഏകാഗ്രതയും: വിജനമായ മരുഭൂമിയിൽ ആടുകളുമായി ചെലവഴിച്ച സമയം പ്രകൃതിയെ നിരീക്ഷിക്കാനും അല്ലാഹുവിന്റെ സൃഷ്ടിമഹത്വത്തെക്കുറിച്ച് ചിന്തിക്കാനും ആത്മീയത വളർത്താനും പ്രവാചകന് അവസരം നൽകി.

♦️ തിന്മകളിൽ നിന്നുള്ള സംരക്ഷണം (അല്ലാഹുവിന്റെ കാവൽ):

അലി ബിൻ അബീത്വാലിബ് (റ) പറയുന്നു: പ്രവാചകൻ (സ) പറയുന്നത് ഞാൻ കേട്ടു:

​"ജാഹിലിയ്യാ കാലഘട്ടത്തിലെ ആളുകൾ ചെയ്തിരുന്ന കാര്യങ്ങളിൽ രണ്ടെണ്ണമൊഴികെ മറ്റൊന്നിനെക്കുറിച്ചും എനിക്ക് ആഗ്രഹം തോന്നിയിട്ടില്ല. ആ രണ്ടു ഘട്ടത്തിലും ഞാൻ ആഗ്രഹിച്ച കാര്യത്തിനും എനിക്കുമിടയിൽ അല്ലാഹു തടസ്സം സൃഷ്ടിക്കുകയുണ്ടായി. അതിനുശേഷം അല്ലാഹു എന്നെ തന്റെ പ്രവാചകത്വം നൽകി ആദരിക്കുന്നത് വരെ തിന്മയായ യാതൊരു കാര്യത്തെക്കുറിച്ചും ഞാൻ ആഗ്രഹിച്ചിട്ടില്ല.

​മക്കയുടെ ഉയർന്ന ഭാഗത്ത് എന്റെ കൂടെ ആട് മേയ്ച്ചിരുന്ന ചെറുപ്പക്കാരനോട് ഒരു രാത്രി ഞാൻ പറഞ്ഞു: 'മക്കയിലെ യുവാക്കൾ രാത്രികളിൽ ഒത്തുകൂടി വിനോദങ്ങളിൽ ഏർപ്പെടുന്നത് പോലെ എനിക്കും മക്കയിൽ പോയി പങ്കെടുക്കാൻ സാധിക്കേണ്ടതിന് എന്റെ ആടുകളെക്കൂടി നീ ഒന്ന് നോക്കാമോ?' അവൻ പറഞ്ഞു: 'ശരി, ഞാൻ നോക്കാം.'

​അങ്ങനെ ഞാൻ പുറപ്പെട്ട് മക്കയിലെ ആദ്യത്തെ വീടുകൾക്കടുത്ത് എത്തിയപ്പോൾ സംഗീതത്തിന്റെ ശബ്ദം കേട്ടു. ഞാൻ ചോദിച്ചു: 'ഇത് എന്താണ്?' ആളുകൾ പറഞ്ഞു: 'ഇന്നയാൾ ഇന്ന സ്ത്രീയെ വിവാഹം കഴിക്കുകയാണ് (അതിന്റെ ആഘോഷമാണ്).' ഞാൻ അത് കേട്ടുകൊണ്ട് അവിടെയിരുന്നു. അപ്പോൾ അല്ലാഹു എന്റെ കാതുകളിൽ ഉറക്കം ബാധിപ്പിച്ചു. അല്ലാഹുവാണെ സത്യം, പിറ്റേന്ന് രാവിലെ സൂര്യന്റെ ചൂടല്ലാതെ എന്നെ ഉണർത്തിയില്ല. അങ്ങനെ ഞാൻ എന്റെ കൂട്ടുകാരന്റെ അടുത്തേക്ക് മടങ്ങിപ്പോയി. അവൻ ചോദിച്ചു: 'നീ എന്തു ചെയ്തു?' ഞാൻ പറഞ്ഞു: 'ഞാൻ ഒന്നും ചെയ്തില്ല', തുടർന്ന് സംഭവിച്ചതെല്ലാം അവനോട് വിശദീകരിച്ചു.

​പിന്നീടൊരു രാത്രിയിൽ ഞാൻ അവനോട് വീണ്ടും അതുപോലെ തന്നെ ആവശ്യപ്പെട്ടു. ഞാൻ മക്കയിലേക്ക് പ്രവേശിച്ചപ്പോൾ മുൻപത്തെപ്പോലെ തന്നെ സംഗീത ശബ്ദം കേൾക്കുകയും, അതേ മറുപടി തന്നെ ലഭിക്കുകയും ചെയ്തു. ഞാൻ അത് കേട്ടുകൊണ്ട് ഇരുന്നപ്പോൾ അല്ലാഹു വീണ്ടും എന്റെ കാതുകളിൽ ഉറക്കം ബാധിപ്പിച്ചു. അല്ലാഹുവാണെ സത്യം, സൂര്യന്റെ ചൂടല്ലാതെ എന്നെ ഉണർത്തിയില്ല. അങ്ങനെ ഞാൻ കൂട്ടുകാരന്റെ അടുത്തേക്ക് മടങ്ങി. അവൻ ചോദിച്ചു: 'നീ എന്തു ചെയ്തു?' ഞാൻ പറഞ്ഞു: 'ഒന്നുമില്ല.' അതിനുശേഷം, അല്ലാഹു പ്രവാചകത്വം നൽകി എന്നെ ആദരിക്കുന്നത് വരെ ജാഹിലിയ്യാ കാലത്തെ ആളുകൾ ചെയ്തിരുന്ന യാതൊരു തിന്മയെക്കുറിച്ചും ഞാൻ ആഗ്രഹിച്ചിട്ടേയില്ല." (അൽ മുസ്‌തദ്റക് - ഹാക്കിം ). 

♦️ശിർക്കിൽ നിന്നുള്ള സംരക്ഷണം:

ഹനീഫ് പരമ്പര: പ്രവാചകത്വത്തിന് മുമ്പുള്ള അജ്ഞാന കാലഘട്ടത്തിലും (ജാഹിലിയ്യാ കാലം) മക്കയിലെ വിഗ്രഹാരാധനയിൽ നിന്ന് പൂർണ്ണമായും മാറിനിന്ന ചെറിയൊരു വിഭാഗം ആളുകൾ മക്കയിലുണ്ടായിരുന്നു. പ്രവാചകൻ ഇബ്രാഹീം (അ) കൊണ്ടുവന്ന ഏകദൈവവിശ്വാസത്തിന്റെ (ഹനീഫിയ്യ) വഴിയായിരുന്നു പ്രവാചകനും പിന്തുടർന്നിരുന്നത്

​അബ്ദുല്ലാഹിബ്നു ഉമർ (റ) നിവേദനം ചെയ്യുന്നു:

​പ്രവാചകത്വത്തിന് മുമ്പ് (വഹ്‌യ് ലഭിക്കുന്നതിന് മുമ്പ്) 'ബൽദഹ്' എന്ന സ്ഥലത്തുവെച്ച് പ്രവാചകൻ (സ) സെയ്ദ് ബിൻ അമ്ര് ബിൻ നുഫൈലിനെ കണ്ടുമുട്ടി. അന്ന് പ്രവാചകന് മുന്നിലേക്ക് ഭക്ഷണം (മാംസം) വെക്കപ്പെടുകയും പ്രവാചകൻ അത് കഴിക്കാൻ വിസമ്മതിക്കുകയും ചെയ്തു. തുടർന്ന് അത് സെയ്ദ് ബിൻ അമ്രിന് നൽകിയപ്പോൾ അദ്ദേഹം പറഞ്ഞു: "നിങ്ങൾ വിഗ്രഹങ്ങൾക്ക് മുന്നിൽ വെച്ച് അറുക്കുന്നതൊന്നും ഞാൻ കഴിക്കാറില്ല. അല്ലാഹുവിന്റെ നാമം ഉച്ചരിച്ച് അറുത്തതല്ലാതെ ഞാൻ ഭക്ഷിക്കുകയുമില്ല."ബുഖാരി 3826, 5499)

സ്വഹീഹ് ബുഖാരിയുടെ പ്രശസ്ത വ്യാഖ്യാന ഗ്രന്ഥമായ ഫത്ഹുൽ ബാരിയിൽ ഹാഫിള് ഇബ്നു ഹജർ അൽ-അസ്ഖലാനി ഈ ഹദീസിനെ വിശകലനം ചെയ്തുകൊണ്ട് പ്രധാനപ്പെട്ട ചില കാര്യങ്ങൾ വ്യക്തമാക്കുന്നു:

മക്കയിലെ ഖുറൈശികൾ പ്രവാചകന് മുന്നിൽ വെച്ച മാംസമായിരുന്നു അത്. വിഗ്രഹങ്ങൾക്കായി അറുത്തതായതുകൊണ്ട് പ്രവാചകൻ ആദ്യമേ തന്നെ അത് കഴിക്കാൻ വിസമ്മതിച്ചു.

​

പ്രവാചകൻ അത് നിരസിച്ചതിന് ശേഷം, ഖുറൈശികൾ അത് സെയ്ദ് ബിൻ അമ്ര് ബിൻ നുഫൈലിന് മുന്നിലേക്ക് വെച്ചു. അപ്പോഴാണ് സെയ്ദ് ബിൻ അമ്ര് ഖുറൈശികളോടായി "നിങ്ങൾ വിഗ്രഹങ്ങളുടെ പേരിൽ അറുക്കുന്നത് ഞാൻ തിന്നില്ല" എന്ന് വ്യക്തമാക്കിയത്.

​

മക്കക്കാർ വിഗ്രഹങ്ങളുടെ പേരിൽ അറുക്കുന്ന മാംസം പ്രവാചകൻ കഴിക്കാറില്ലായിരുന്നു എന്നതിന് വ്യക്തമായ തെളിവാണ് പ്രവാചകൻ അത് ആദ്യം തന്നെ നിരസിച്ചത്. സെയ്ദ് ബിൻ അമ്രിന്റെ മറുപടി ഖുറൈശികളുടെ ആചാരങ്ങൾക്കെതിരെയുള്ള പരസ്യമായ പ്രഖ്യാപനമായിരുന്നു. (ഫത്ഹുൽ ബാരി)

♦️ഇമാം അഹ്മദ് (റ) ഉദ്ധരിക്കുന്ന മറ്റൊരു സ്വഹീഹായ നിവേദനത്തിൽ പ്രവാചകൻ (സ) സെയ്ദ് ബിൻ അമ്രിനോട് പറയുന്നത് കാണാം:

​"ഞാൻ വിഗ്രഹങ്ങളുടെ പേരിൽ അറുക്കപ്പെട്ടവ ഭക്ഷിക്കാറില്ല."

♦️പ്രവാചകന്റെ ചെറുപ്പത്തിൽ, സിറിയയിലേക്കുള്ള കച്ചവട യാത്രയ്ക്കിടയിൽ ബഹീറ എന്ന ക്രിസ്തീയ പുരോഹിതനുമായി കൂടിക്കാഴ്ച നടന്ന സംഭവം കഴിഞ്ഞ അധ്യായത്തിൽ വിവരിച്ചു.

​ബഹീറ നബിയോട് 'ലാത്ത', 'ഉസ്സ' (മക്കക്കാരുടെ പ്രധാന വിഗ്രഹങ്ങൾ) എന്നിവയുടെ പേരിൽ സത്യം ചെയ്ത് ചില ചോദ്യങ്ങൾക്ക് മറുപടി നൽകാൻ ആവശ്യപ്പെട്ടപ്പോൾ, ചെറുപ്പമായിരുന്ന മുഹമ്മദ് നബി (സ) പറഞ്ഞു: "എന്റെ അടുക്കൽ ഏറ്റവും വെറുപ്പുള്ള കാര്യം ഈ വിഗ്രഹങ്ങളാണ്, അതിനാൽ അവയുടെ പേരിൽ എന്നോട് ഒന്നും ചോദിക്കരുത്."

♦️മദ്യപാനം വ്യാപകമായ സമൂഹത്തിൽ ജീവിച്ചിട്ടും പ്രവാചകൻ നുബുവ്വത്തിനു മുമ്പും ഒരിക്കലും മദ്യപിച്ചിരുന്നില്ല.

പ്രവാചകന്റെ പിതൃവ്യനായ അബ്ബാസ് ബിൻ അബ്ദിൽ മുത്തലിബ് (റ) പറയുന്നതായി ചരിത്രഗ്രന്ഥങ്ങളിൽ രേഖപ്പെടുത്തിയിട്ടുണ്ട്:

​"ജാഹിലിയ്യാ കാലഘട്ടത്തിൽ പോലും മുഹമ്മദ് വിഗ്രഹങ്ങൾക്ക് ബലി നൽകപ്പെട്ട ഭക്ഷണങ്ങൾ കഴിക്കുകയോ മദ്യപിക്കുകയോ ചെയ്യുന്നത് ഞങ്ങൾ കണ്ടിട്ടില്ല."

​ സത്യസന്ധത, സ്വഭാവമഹിമ, ധാർമ്മികത എന്നിവയാൽ പ്രവാചകത്വത്തിന് മുമ്പ് തന്നെ മക്കയിലെ ആളുകൾക്കിടയിൽ 'അൽ-അമീൻ' (വിശ്വസ്തൻ), 'അസ്-സ്വാദിഖ്' (സത്യസന്ധൻ) എന്നീ നാമങ്ങളിലാണ് പ്രവാചകൻ അറിയപ്പെട്ടിരുന്നത്

🕋മുഹമ്മദ് നബി ﷺ യുടെ ജീവചരിത്രം. അധ്യായം 5.

യൗവനം- ഹിൽഫുൽ ഫുദൂൽ, വിവാഹം.

------------------------------------------------

 ഇസ്‌ലാമിന് മുൻപ് മക്കയിൽ നടന്ന ഏറ്റവും മാതൃകാപരമായ ചരിത്ര കരാറാണ് ഹിൽഫുൽ ഫുദൂൽ (حِلْفُ الفُضُول - Alliance of Virtue). പ്രവാചകൻ (സ) യുടെ ഇരുപതാം വയസ്സിൽ (ഹർബുൽ ഫിജാർ അഥവാ ഫിജാർ യുദ്ധത്തിന് തൊട്ടുപിന്നാലെ) ധുൽ ഖഅദ മാസത്തിലാണ് ഈ സമാധാന കരാർ ഉണ്ടാകുന്നത്.

 കരാറിനുള്ള പശ്ചാത്തലം:

യമനിലെ സബീദ്  ഗോത്രക്കാരനായ ഒരു കച്ചവടക്കാരൻ തന്റെ ചരക്കുകളുമായി മക്കയിലെത്തി. മക്കയിലെ ഖുറൈശി പ്രമുഖനും ഉമയ്യദ് ഗോത്രക്കാരനുമായ ആസ് ബിൻ വാഇൽ അസ്സഹ്മി ആ ചരക്കുകൾ വാങ്ങിയെങ്കിലും അതിന്റെ തുക നൽകാൻ കൂട്ടാക്കിയില്ല.

നിസ്സഹായനായ കച്ചവടക്കാരൻ ഖുറൈശി പ്രമുഖരെ സമീപിച്ച് സഹായം അഭ്യർത്ഥിച്ചെങ്കിലും, ആസ് ബിൻ വാഇലിന്റെ സ്വാധീനം കാരണം ആരും അദ്ദേഹത്തെ സഹായിക്കാൻ മുന്നോട്ടുവന്നില്ല. തുടർന്ന് ആ കച്ചവടക്കാരൻ മക്കയിലെ 'അബൂഖുബൈസ്' മലമുകളിൽ കയറിനിന്ന് ഖുറൈശികളുടെ അനീതിക്കെതിരെ ഉറക്കെ കവിത ചൊല്ലി വിലാപമറിയിച്ചു.

കച്ചവടക്കാരന്റെ വിലാപം കേട്ട പ്രവാചകന്റെ പിതൃവ്യൻ സുബൈർ ബിൻ അബ്ദിൽ മുത്ത്വലിബ്  വിഷയം ഏറ്റെടുക്കുകയും ഖുറൈശി ഗോത്രങ്ങളെ ഒന്നിപ്പിക്കാൻ മുൻകൈ എടുക്കുകയും ചെയ്തു.

തുടർന്ന് തൈം ഗോത്ര തലവനായ അബ്ദുള്ള ബിൻ ജുദ്ആന്റെ വീട്ടിൽ ഖുറൈശികളിലെ പ്രധാന ഗോത്രങ്ങൾ ഒത്തുചേർന്നു:

 * ബനൂ ഹാശിം

 * ബനൂ അബ്ദിൽ മുത്ത്വലിബ്

 * ബനൂ അസദ്

 * ബനൂ സഹ്റ

 * ബനൂ തൈം

അവർ അബ്ദുള്ള ബിൻ ജുദ്ആൻ ഒരുക്കിയ വിരുന്നിൽ പങ്കെടുത്ത ശേഷം കഅ്ബയുടെ അരികിൽ വെച്ച് വിശുദ്ധമായ ഒരു കരാറിലേർപ്പെട്ടു.

♦️കരാറിലെ പ്രധാന വ്യവസ്ഥ:

 "മക്കയിലെ സ്വദേശിയോ വിദേശിയോ ആയ ഏത് വ്യക്തി അതിക്രമത്തിന് ഇരയായാലും, അവർക്ക് അർഹമായ അവകാശം തിരികെ ലഭിക്കുന്നതുവരെ അവരോടൊപ്പം നിൽക്കുകയും അക്രമിക്കെതിരെ ഒന്നിച്ചു പോരാടുകയും ചെയ്യും."

കരാറിന് ശേഷം എല്ലാവരും ഒന്നിച്ചുചെന്ന് ആസ് ബിൻ വാഇലിൽ നിന്ന് യമനി കച്ചവടക്കാരന്റെ പണം ഈടാക്കി നൽകി.

 പ്രവാചകന്റെ (സ) സാന്നിധ്യവും പദവിയും കരാർ നടക്കുമ്പോൾ 20 വയസ്സുണ്ടായിരുന്ന പ്രവാചകൻ (സ) ഈ യോഗത്തിൽ നേരിട്ട് പങ്കെടുത്തിരുന്നു. പ്രവാചകത്വത്തിന് ശേഷവും ഈ കരാറിനെ തിരുനബി (സ) ഏറെ ആദരവോടെയും അഭിമാനത്തോടെയും ഓർക്കുമായിരുന്നു.

സ്വഹീഹായ ഹദീസുകളിൽ പ്രവാചകൻ (സ) ഇപ്രകാരം പറഞ്ഞതായി കാണാം:

 "അബ്ദുള്ള ബിൻ ജുദ്ആന്റെ വീട്ടിൽ വെച്ച് നടന്ന ഒരു കരാറിന് (ഹിൽഫുൽ ഫുദൂൽ) ഞാൻ സാക്ഷിയാവുകയുണ്ടായി. അതിന് പകരം ചുവന്ന ഒട്ടകങ്ങളെ തന്നാൽ പോലും എനിക്കത് സ്വീകാര്യമാകുമായിരുന്നില്ല. ഇസ്‌ലാമിന് ശേഷവും അതിലേക്ക് എന്നെ ക്ഷണിച്ചാൽ തീർച്ചയായും ഞാൻ അത് സ്വീകരിക്കും."

(സുനൻ അൽ-കുബ്‌റാ - ബൈഹഖി)

ചരിത്രപരമായ പ്രാധാന്യം:

അജ്ഞാന കാലഘട്ടത്തിലെ (ജാഹിലിയ്യ) വർഗീയതയ്ക്കും ഗോത്രീയതയ്ക്കും അപ്പുറം മനുഷ്യാവകാശ സംരക്ഷണത്തിനും നീതിനിഷ്ഠയ്ക്കും പ്രാധാന്യം നൽകിയ മഹത്തായ മുന്നേറ്റമായിരുന്നു ഹിൽഫുൽ ഫുദൂൽ. 

♦️വിവാഹം:

മക്കയിലെ അതിസമ്പന്നയും മാന്യ കുടുംബാംഗവുമായ വ്യാപാരിയായിരുന്നു ഖദീജ ബിൻത് ഖുവൈലിദ് (റ).

 മക്കയിലെ ജനങ്ങൾക്കിടയിൽ പ്രവാചകൻ (സ) നേടിയിരുന്ന 'അൽ-അമീൻ' (വിശ്വസ്തൻ), 'അസ്സ്വാദിഖ്' (സത്യസന്ധൻ) എന്നീ പദവികളും ഉന്നതമായ സ്വഭാവ മഹിമയും ഖദീജ (റ) അറിയാനിടയായി.

 തന്റെ കച്ചവട ചരക്കുകളുമായി സിറിയയിലെ ചന്തകളിലേക്ക് പോകാൻ അവർ പ്രവാചകനെ ക്ഷണിച്ചു.

 മറ്റുള്ള വ്യാപാരികൾക്ക് നൽകുന്നതിനേക്കാൾ ഇരട്ടി ലാഭവിഹിതവും ഉയർന്ന പ്രതിഫലവും നൽകാം എന്ന് വാഗ്ദാനം ചെയ്തു.

 പ്രവാചകന് ആവശ്യമായ സഹായങ്ങൾ ചെയ്യാനായി തന്റെ വിശ്വസ്തനായ മൈസറ എന്ന അടിമയെയും കൂടെ അയച്ചു.

♦️സിറിയൻ കച്ചവട യാത്രയും അത്ഭുത സംഭവങ്ങളും: 

പ്രവാചകൻ (സ) മൈസറയോടൊപ്പം സിറിയ അതിർത്തിയിലുള്ള ബസ്ര ചന്തയിലേക്ക് യാത്ര തിരിച്ചു. ഈ യാത്രയിലുടനീളം പ്രവാചകന്റെ വിശിഷ്ട ഗുണങ്ങളും ചില അത്ഭുതങ്ങളും മൈസറ നേരിട്ട് നിരീക്ഷിച്ചു:

വഴിമധ്യേ ഒരു മരത്തണലിൽ പ്രവാചകൻ (സ) വിശ്രമിക്കുമ്പോൾ അവിടുത്തെ കണ്ട 'നസ്തൂറ' എന്ന ക്രിസ്ത്യൻ സന്യാസി മൈസറയോട് ചോദിച്ചു: "ഈ മരച്ചുവട്ടിൽ ഇറങ്ങിയിരിക്കുന്ന ആൾ ആരാണ്?" മൈസറ പറഞ്ഞു: "മക്കയിലെ ഹറം നിവാസികളിൽപ്പെട്ട ഒരാളാണ്." അപ്പോൾ പാതിരി പറഞ്ഞു: "ഒരു പ്രവാചകനല്ലാതെ മറ്റാരും ഈ മരത്തണലിൽ ഇതുവരെ ഇറങ്ങിയിട്ടില്ല!"

 മേഘത്തണൽ:

 കഠിനമായ വെയിലുള്ള സമയത്ത് രണ്ട് മലക്കുകൾ പ്രവാചകന് മീതെ മേഘത്തണൽ വിരിച്ച് അകമ്പടി സേവിക്കുന്നത് മൈസറ കണ്ടു.

 ബിസിനസ്സിൽ പ്രവാചകൻ കാണിച്ച കൃത്യതയും സത്യസന്ധതയും കാരണം മുൻപെങ്ങുമില്ലാത്തവിധം ഇരട്ടി ലാഭത്തോടെയാണ് കച്ചവടസംഘം മക്കയിലേക്ക് മടങ്ങിയത്.

മക്കയിൽ തിരിച്ചെത്തിയ ശേഷം, യാത്രയിലുടനീളം താൻ കണ്ട അത്ഭുത പ്രതിഭാസങ്ങളും പ്രവാചകന്റെ ഉന്നതമായ പെരുമാറ്റവും സത്യസന്ധതയും മൈസറ ഖദീജ (റ) യോട് വിശദീകരിച്ചു.

 ഇത് കേട്ട ഖദീജ (റ) ക്ക് പ്രവാചകനോടുള്ള ആദരവും ഇഷ്ടവും വർദ്ധിച്ചു.

 അക്കാലത്ത് ഖുറൈശി പ്രമുഖരായ പല സമ്പന്നരും ഖദീജ (റ) യെ വിവാഹം കഴിക്കാൻ ആഗ്രഹിച്ചിരുന്നെങ്കിലും അവർ അത് നിരസിക്കുകയാണുണ്ടായത്.

 എന്നാൽ ഖദീജ (റ) തന്റെ അടുത്ത കൂട്ടുകാരിയായ നഫീസ ബിൻത് മുന്യ വഴി പ്രവാചകന്റെ അടുക്കലേക്ക് രഹസ്യമായി വിവാഹാഭ്യർത്ഥന അറിയിച്ചു.

 പ്രവാചകൻ (സ) ഈ വിഷയം തന്റെ പിതൃവ്യന്മാരായ അബൂത്വാലിബ്, ഹംസ (റ) എന്നിവരുമായി ചർച്ച ചെയ്യുകയും അവർ സന്തോഷത്തോടെ അത് സ്വീകരിക്കുകയും ചെയ്തു.

 ♦️വിവാഹസമയത്ത് പ്രവാചകന് 25 വയസ്സും ഖദീജ (റ) ക്ക് 40 വയസ്സുമായിരുന്നു (ചില ചരിത്രരേഖകളിൽ 28 വയസ്സ് എന്നും കാണാം). 20 ഒട്ടകങ്ങളാണ് പ്രവാചകൻ (സ) മഹറായി നൽകിയത്.

 

 അബൂത്വാലിബാണ് ചടങ്ങിൽ വിവാഹ പ്രസംഗം (ഖുതുബ) നടത്തിയത്. ഖദീജ (റ) യുടെ പിതാവിന്റെ സഹോദരനായ അംറ് ബിൻ അസദ് ഖദീജ (റ) യുടെ രക്ഷിതാവായി (വലിയ്യ്) ചടങ്ങിൽ പങ്കെടുത്തു.

സന്തോഷകരമായ ദാമ്പത്യം

ഖദീജ (റ) ജീവിച്ചിരുന്ന കാലത്തോളം പ്രവാചകൻ (സ) മറ്റൊരു വിവാഹം കഴിച്ചിരുന്നില്ല. പ്രവാചകത്വ ലഭനത്തിന് ശേഷമുള്ള കഠിനമായ പരീക്ഷണ ഘട്ടങ്ങളിലത്രയും സാമ്പത്തികമായും മാനസികമായും പ്രവാചകന് ഏറ്റവും വലിയ താങ്ങായി നിന്നത് ഖദീജ (റ) ആയിരുന്നു. പ്രവാചകന്റെ ഇബ്രാഹീം ഒഴികെയുള്ള എല്ലാ മക്കളും (ഖാസിം, അബ്ദുള്ള, സൈനബ്, റുകിയ്യ, ഉമ്മു കുൽഥൂം, ഫാത്വിമ) ഖദീജ (റ) യിലാണ് ജനിച്ചത്.

♦️ഉമ്മുൽ മുഅ്മിനീൻ ആഇശ (റ) പ്രവാചകൻ (സ) യുടെ ആദ്യ ഭാര്യയായ ഖദീജ (റ) യെക്കുറിച്ച് പറഞ്ഞിട്ടുള്ള ഏറ്റവും പ്രശസ്തമായ ഹദീസ് സ്വഹീഹുൽ ബുഖാരിയിലും മുസ്ലിമിലും വന്നിട്ടുണ്ട്. ഈ ഹദീസിൽ ആഇശ (റ) തനിക്ക് ഖദീജയോട് തോന്നിയ അസൂയയെക്കുറിച്ച് പറയുന്നുണ്ട്.

ആഇശ (റ) നിവേദനം ചെയ്യുന്നു:

"പ്രവാചകൻ (സ) യുടെ മറ്റു ഭാര്യമാരിൽ ആരോടും എനിക്ക് ഞാൻ ഒരിക്കലും കണ്ടിട്ടില്ലാത്ത  ഖദീജയോട് തോന്നിയ അത്രമാത്രം അസൂയ തോന്നിയിട്ടില്ല. നബി (സ) എപ്പോഴും ഖദീജയെക്കുറിച്ച് പറയുകയും, ഒരു ആടിനെ അറുക്കുമ്പോൾ അതിന്റെ ഭാഗങ്ങൾ ഖദീജയുടെ കൂട്ടുകാരികൾക്ക് അയച്ചുകൊടുക്കുകയും ചെയ്തിരുന്നു.

അങ്ങനെ ഒരിക്കൽ ഞാൻ ചോദിച്ചു, 'നിങ്ങൾ എപ്പോഴും ഖദീജയെക്കുറിച്ചാണല്ലോ പറയുന്നത്, അവർ ഒരു വയസ്സിയായ ഒരു സ്ത്രീ ആയിരുന്നില്ലേ? അല്ലാഹു നിങ്ങൾക്ക് അവർക്ക് പകരം അതിലും നല്ലവരെ നൽകിയിട്ടുണ്ടല്ലോ!'

അപ്പോൾ നബി (സ) പറഞ്ഞു, 'അല്ലാഹുവാണെ സത്യം, എനിക്ക് ഖദീജയെക്കാൾ മികച്ച വേറെ ആരെയും നൽകിയിട്ടില്ല. ജനങ്ങൾ എന്നെ അവിശ്വസിച്ചപ്പോൾ അവർ എന്നെ വിശ്വസിച്ചു. ജനങ്ങൾ എന്നെ ഉപേക്ഷിച്ചപ്പോൾ അവർ എന്നെ സഹായിച്ചു. തന്റെ സമ്പത്ത് കൊണ്ട് എന്നെ സഹായിക്കുകയും ചെയ്തു'. (ബുഖാരി 3818 / മുസ്ലിം 2435).

🕋മുഹമ്മദ് നബി ﷺ യുടെ ജീവചരിത്രം. അധ്യായം 6.

കഅ്ബ പുനർനിർമ്മാണവും ഹജറുൽ അസ്‌വദ് സ്ഥാപിക്കലും.

-----------------------------------------------------------

♦️പ്രവാചകത്വത്തിന് അഞ്ച് വർഷം മുമ്പ് (പ്രവാചകന് 35 വയസ്സുള്ളപ്പോൾ) കഅ്ബ പുനർ നിർമ്മാണം ആവശ്യമായി വന്നു:

 

മക്കയിലുണ്ടായ കഠിനമായ വെള്ളപ്പൊക്കത്തിൽ (സൈലുൽ ആരിം) കഅ്ബയുടെ ഭിത്തികൾക്ക് ഗുരുതരമായ വിള്ളലുകൾ വീണു. അതിനുമുമ്പ് നടന്ന ഒരു തീപിടുത്തം കാരണം ഭിത്തികൾ ദുർബലമായിരുന്നു. കൂടാതെ അക്കാലത്ത് കഅ്ബക്ക് മേൽക്കൂരയുണ്ടായിരുന്നില്ല; ഉയരം വെറും ഒൻപത് മുഴം മാത്രമായിരുന്നതിനാൽ കഅ്ബക്കുള്ളിലെ നിധികൾ മോഷ്ടിക്കപ്പെടാൻ സാധ്യതയുണ്ടായിരുന്നു.

ഖുറൈശികൾ കഅ്ബ പൊളിച്ച് വീണ്ടും പണിയാൻ തീരുമാനിച്ചപ്പോൾ ഒരു പ്രധാന നിബന്ധന വെച്ചു:

"കഅ്ബ നിർമ്മാണത്തിനായി ഹലാലായ (പരിശുദ്ധമായ) പണം മാത്രമേ ഉപയോഗിക്കാവൂ. പലിശപ്പണം, അക്രമത്തിലൂടെ പിടിച്ചെടുത്തത്, വ്യഭിചാരത്തിലൂടെയോ അന്യായമായോ സമ്പാദിച്ചത് എന്നിവയൊന്നും കഅ്ബക്കായി ചെലവഴിക്കരുത്."

വിശുദ്ധമായ പണം മാത്രം ഉപയോഗിച്ചതിനാൽ സാമ്പത്തിക തികവില്ലാതെ വരികയും, കഅ്ബയുടെ വടക്കുഭാഗത്തുള്ള ഒരു ഭാഗം (ഇബ്രാഹീം നബിയുടെ അടിത്തറയിലുണ്ടായിരുന്ന ഭാഗം) ഒഴിവാക്കേണ്ടി വരികയും ചെയ്തു. ഈ ഭാഗമാണ് ഇന്ന് 'ഹിജ്ര് ഇസ്മാഈൽ' എന്നറിയപ്പെടുന്നത്.

ഭിത്തികൾ ഉയർത്താൻ മക്കയിലെ പ്രധാന ഗോത്രങ്ങൾ കഅ്ബയുടെ ഓരോ ഭാഗങ്ങളും വീതിച്ചെടുത്തു. 'ബാഖൂം' എന്ന റൂമിയായ തച്ചനാണ് നിർമ്മാണ മേൽനോട്ടം വഹിച്ചത്.

♦️കഅ്ബയുടെ ഭിത്തികൾ ഉയർത്തുന്നതിനായി മക്കയിലെ പ്രമുഖരും യുവാക്കളും മലനിരകളിൽ നിന്ന് കല്ലുകൾ ചുമന്നുകൊണ്ടുവരികയായിരുന്നു. പ്രവാചകൻ (സ) യും പിതൃവ്യനായ അബ്ബാസ് ബിൻ അബ്ദിൽ മുത്ത്വലിബും (റ) ഈ ഉദ്യമത്തിൽ പങ്കാളികളായി കല്ലുകൾ ചുമക്കുന്നുണ്ടായിരുന്നു.

കല്ലുകൾ ചുമക്കുമ്പോൾ തോളിലെ തോലിന് പരിക്കേൽക്കാതിരിക്കാൻ മക്കയിലെ മറ്റുള്ളവരെപ്പോലെ ഉടുത്തിരുന്ന വസ്ത്രം അഴിച്ച് തോളിൽ വെച്ച് അതിനു മീതെ കല്ല് വെക്കാൻ അബ്ബാസ് (റ) പ്രവാചകനോട് നിർദ്ദേശിച്ചു. അക്കാലത്ത് അത് അവിടെ സർവ്വസാധാരണമായ ഒരു രീതിയായിരുന്നു. 

പിതൃവ്യന്റെ നിർദ്ദേശപ്രകാരം വസ്ത്രം അഴിക്കാൻ ശ്രമിച്ച നിമിഷം തന്നെ പ്രവാചകൻ (സ) നിലത്തേക്ക് ബോധരഹിതനായി വീണു.

ബോധം വീണ്ടുകിട്ടിയ ഉടൻ തന്നെ പ്രവാചകൻ (സ) പരിഭ്രാന്തിയോടെ "എന്റെ വസ്ത്രം! എന്റെ വസ്ത്രം!" എന്ന് വിളിച്ചുപറയുകയും ഉടുമുണ്ട് ഉടുക്കുകയും ചെയ്തു.

പ്രവാചകത്വത്തിന് മുമ്പ് ജാഹിലിയ്യാ കാലഘട്ടത്തിൽ പോലും അല്ലാഹു തിരുനബിയെ നഗ്നത വെളിപ്പെടുന്നതിൽ നിന്നും അനാചാരങ്ങളിൽ നിന്നും മലക്കുകൾ മുഖേന സംരക്ഷിച്ചു എന്നതിന് തെളിവാണ് ഈ സംഭവം.

 (സ്വഹീഹുൽ ബുഖാരി 364,സ്വഹീഹ് മുസ്ലിം 340 )

♦️നിർമ്മാണം പൂർത്തിയായി, 'ഹജറുൽ അസ്‌വദ്' (കറുത്ത കല്ല്) അതിന്റെ സ്ഥാനത്ത് പുനഃസ്ഥാപിക്കേണ്ട ഘട്ടമെത്തിയപ്പോൾ വലിയ തർക്കമുണ്ടായി

 ഹജറുൽ അസ്‌വദ് എടുത്ത് വെക്കുക എന്നത് വലിയ ആദരവായതിനാൽ ഓരോ ഗോത്രവും ആ പദവി തങ്ങൾക്ക് വേണമെന്ന് വാദിച്ചു. തർക്കം രൂക്ഷമാവുകയും നാലോ അഞ്ചോ ദിവസം നിർമ്മാണം സ്തംഭിക്കുകയും ചെയ്തു. 

ബനൂ അബ്ദിദ്ദാർ, ബനൂ അദിയ്യ് എന്നീ ഗോത്രങ്ങൾ രക്തം നിറച്ച പാത്രത്തിൽ കൈമുക്കി രക്തച്ചൊരിച്ചിലിന് വരെ തയ്യാറായി കരാർ ചെയ്തു.

യുദ്ധത്തിന്റെ വക്കിലെത്തിയപ്പോൾ ഖുറൈശികളിലെ പ്രായം ചെന്ന പ്രമുഖനായ അബൂ ഉമയ്യ ബിൻ അൽ-മുഗീറ അൽ-മഖ്സൂമി ഒരു മധ്യസ്ഥ നിർദ്ദേശം മുന്നോട്ടുവെച്ചു:

"നാളെ പ്രഭാതത്തിൽ ഹറമിലെ സ്വർണ്ണവാതിലിലൂടെ (ബാബു ബനീ ശൈബ) ആദ്യമായി പ്രവേശിക്കുന്ന ആൾ ആര് എന്ന് നോക്കുക. അവൻ ഇതിൽ അന്തിമതീരുമാനം എടുക്കട്ടെ."

എല്ലാവരും ഈ നിർദ്ദേശം സന്തോഷത്തോടെ സമ്മതിച്ചു. അടുത്ത ദിവസം രാവിലെയെത്തിയ എല്ലാവരും ഉറ്റുനോക്കവെ, ബാബു ബനീ ശൈബയിലൂടെ ആദ്യം പ്രവേശിച്ചത് മുഹമ്മദ് നബി (സ) ആയിരുന്നു!

അവിടുത്തെ കണ്ട മാത്രയിൽ എല്ലാവരും ഒരേസ്വരത്തിൽ വിളിച്ചുപറഞ്ഞു:

"ഹാദൽ അമീൻ! രളീനാ ബിഹി!" (ഇതാ അൽ-അമീൻ - വിശ്വസ്തൻ - വന്നിരിക്കുന്നു! ഇദ്ദേഹത്തിന്റെ തീരുമാനത്തിൽ ഞങ്ങൾ തൃപ്തരാണ്!)

വലിയൊരു ഗോത്രയുദ്ധം ഒഴിവാക്കിക്കൊണ്ട് പ്രവാചകൻ (സ) അതിവിദഗ്ദ്ധമായ ഒരു പോംവഴി മുന്നോട്ടുവെച്ചു: അവിടുന്ന് ഒരു തൂവാല (മേൽവസ്ത്രം) വിരിച്ചു.

 സ്വന്തം കൈകൊണ്ട് ഹജറുൽ അസ്‌വദ് എടുത്ത് അതിനു മധ്യത്തിൽ വെച്ചു. തർക്കത്തിലുണ്ടായിരുന്ന ഓരോ ഗോത്രത്തലവന്മാരോടും ആ തുണിയുടെ ഓരോ അരികുകളിൽ പിടിക്കാൻ ആവശ്യപ്പെട്ടു.എല്ലാവരും ചേർന്ന് കല്ല് ഉയർത്തി സ്ഥാപിക്കേണ്ട സ്ഥാനത്ത് എത്തിച്ചു. കല്ല് സ്ഥാപിക്കേണ്ട കൃത്യമായ സ്ഥാനത്ത് എത്തിയപ്പോൾ, പ്രവാചകൻ (സ) തന്റെ സ്വന്തം കൈകൊണ്ട് ഹജറുൽ അസ്‌വദ് എടുത്ത് അതിന്റെ സ്ഥാനത്ത് ഉറപ്പിച്ചു വെച്ചു.

പ്രവാചകത്വത്തിന് തൊട്ടുമുമ്പ് മക്കയിലെ സകല ഗോത്രങ്ങൾക്കിടയിലും പ്രവാചകന് ലഭിച്ച സർവ്വസ്വീകാര്യതയും ബഹുമാനവുമാണ് ഈ സംഭവം വ്യക്തമാക്കുന്നത്.

🕋മുഹമ്മദ് നബി ﷺ യുടെ ജീവചരിത്രം. അധ്യായം 7. 

പ്രവാചകത്വ ലബ്ധി

------------------------------------------------

♦️പ്രവാചകത്വത്തിന് തൊട്ടുമുമ്പുള്ള കാലഘട്ടത്തിൽ മക്കയിലെ ജനങ്ങളുടെ ബഹുദൈവാരാധനയും അനാചാരങ്ങളും അപരിഷ്കൃത രീതികളും പ്രവാചകൻ (സ) യെ ഏറെ അസ്വസ്ഥനാക്കിയിരുന്നു.

 മക്കയിൽ നിന്ന് ഏകദേശം 3.2 കി.മീ അകലെയുള്ള ജബലുന്നൂർ മലയുടെ മുകളിലുള്ള ഹിറാ ഗുഹയിൽ റമദാൻ മാസങ്ങളിൽ പ്രവാചകൻ (സ) ഭക്ഷണവും വെള്ളവുമായി തിരിക്കുകയും ദിവസങ്ങളോളം അവിടെ ഏകാന്തനായി കഴിഞ്ഞുകൂടുകയും (തഅന്നുഥ് - ഇബ്രാഹീം നബിയുടെ ഏകദൈവ വിശ്വാസപ്രകാരമുള്ള ആരാധന) ചെയ്യുമായിരുന്നു.

 പ്രവാചകത്വത്തിന് തൊട്ടുമുമ്പുള്ള ആറുമാസം പ്രവാചകൻ കാണുന്ന സ്വപ്നങ്ങൾ നേരം പുലരുന്നതുപോലെ യാഥാർത്ഥ്യമായി പുലരുമായിരുന്നു.

♦️പ്രവാചകന് 40 വയസ്സ് തികഞ്ഞ വർഷം (ക്രി.പി 610 ഓഗസ്റ്റ് / റമദാൻ 21 തിങ്കളാഴ്ച രാത്രി) ഹിറാ ഗുഹയിൽ ധ്യാനത്തിലിരിക്കെ ജിബ്‌രീൽ (അ) അവിടുത്തെ മുന്നിൽ പ്രത്യക്ഷപ്പെട്ടു.

 ജിബ്‌രീൽ (അ) പ്രവാചകനോട് പറഞ്ഞു: "اقْرَأْ" (ഓതുക!) പ്രവാചകൻ (സ) മറുപടി നൽകി: "مَا أَنَا بِقَارِئٍ" (എനിക്ക് ഓതാൻ അറിയില്ല). തുടർന്ന് ജിബ്‌‌രീൽ (അ) പ്രവാചകനെ ചേർത്തണച്ച് കഠിനമായി മുറുക്കിപ്പിടിച്ച ശേഷം വിട്ടു. എന്നിട്ട് വീണ്ടും പറഞ്ഞു: "ഓതുക !" പ്രവാചകൻ വീണ്ടും ആവർത്തിച്ചു: "എനിക്ക് ഓതാൻ അറിയില്ല." മൂന്നാമതും ജിബ്‌രീൽ (അ) പ്രവാചകനെ മുറുക്കിപ്പിടിച്ച് വിട്ടശേഷം വിശുദ്ധ ഖുർആനിലെ ആദ്യ വചനങ്ങൾ (സൂറത്തുൽ അലഖ്: 1-5) ഓതിക്കേൾപ്പിച്ചു:

> اقْرَأْ بِاسْمِ رَبِّكَ الَّذِي خَلَقَ (1) خَلَقَ الْإِنْسَانَ مِنْ عَلَقٍ (2) اقْرَأْ وَرَبُّكَ الْأَكْرَمُ (3) الَّذِي عَلَّمَ بِالْقَلَمِ (4) عَلَّمَ الْإِنْسَانَ مَا لَمْ يَعْلَمْ (5)

 (സൃഷ്ടിച്ചവനായ നിന്റെ നാഥന്റെ നാമത്തിൽ ഓതുക. മനുഷ്യനെ അവൻ രക്തക്കട്ടയിൽ നിന്ന് സൃഷ്ടിച്ചിരിക്കുന്നു. നീ ഓതുക, നിന്റെ നാഥൻ ഏറ്റവും വലിയ ഔദാര്യവാനാകുന്നു. പേന കൊണ്ട് (എഴുതാൻ ) പഠിപ്പിച്ചവൻ. മനുഷ്യന് അറിയാത്തത് അവൻ പഠിപ്പിച്ചു).

♦️ഭയവിഹ്വലനായ പ്രവാചകൻ (സ) വിറയ്ക്കുന്ന ഹൃദയത്തോടെ വീട്ടിലേക്ക് മടങ്ങിയെത്തി ഖദീജ (റ) യോട് പറഞ്ഞു: "زَمِّلُونِي زَمِّلُونِي" (എന്നെ പുതപ്പിച്ചു മൂടൂ, എന്നെ പുതപ്പിച്ചു മൂടൂ!)

അവർ അവിടുത്തെ പുതപ്പിച്ചു മൂടുകയും ഭയം ശമിച്ചപ്പോൾ നടന്ന സംഭവങ്ങൾ വിവരിക്കുകയും ചെയ്തു. "എന്റെ ജീവന് എന്തെങ്കിലും സംഭവിക്കുമോ എന്ന് ഞാൻ ഭയക്കുന്നു" എന്ന് പ്രവാചകൻ പറഞ്ഞപ്പോൾ, മഹതിയായ ഖദീജ (റ) അവിടുത്തെ സമാധാനിപ്പിച്ചുകൊണ്ട് പറഞ്ഞ വാക്കുകൾ ചരിത്രപ്രസിദ്ധമാണ്:

"ഒരിക്കലുമില്ല! അല്ലാഹു സത്യം, അല്ലാഹു നിങ്ങളെ ഒരിക്കലും അപമാനിക്കുകയില്ല. കാരണം താങ്കൾ കുടുംബബന്ധം പുലർത്തുന്നവനാണ്, നിസ്സഹായരുടെ ഭാരം പേറുന്നവനാണ്, ദരിദ്രർക്ക് സമ്പാദിച്ചു നൽകുന്നവനാണ്, അതിഥികളെ സത്കരിക്കുന്നവനാണ്, സത്യമാർഗ്ഗത്തിലെ ആപത്തുകളിൽ ജനങ്ങളെ സഹായിക്കുന്നവനുമാണ്."

ആദ്യ ദിവ്യബോധനത്തിനു ശേഷം ഭയവിഹ്വലനായി വീട്ടിലെത്തിയ പ്രവാചകൻ മുഹമ്മദ് നബി (സ) യെ മഹതിയായ ഖദീജ (റ) ആശ്വസിപ്പിക്കുകയും സംഭവത്തിന്റെ യഥാർത്ഥ വശം മനസ്സിലാക്കാനായി തങ്ങളുടെ പിതൃവ്യപുത്രനായ വറഖത് ബിൻ നൗഫലിന്റെ അടുക്കലേക്ക് കൂട്ടിക്കൊണ്ടുപോവുകയും ചെയ്തു. 

♦️ഖദീജ (റ) യുടെ പിതാവിന്റെ സഹോദരന്റെ മകനായ വറഖത്, ഇസ്‌ലാമിന് മുൻപുള്ള ജാഹിലിയ്യാ കാലഘട്ടത്തിൽ തന്നെ വിഗ്രഹാരാധന ഉപേക്ഷിച്ച വ്യക്തിയായിരുന്നു. ക്രിസ്തുമതം സ്വീകരിക്കുകയും എബ്രായ ഭാഷ പഠിച്ച് ഇൻജീൽ ഗ്രന്ഥങ്ങൾ പകർത്തിയെഴുതുകയും ചെയ്ത പ്രായം ചെന്ന പണ്ഡിതനായിരുന്നു അദ്ദേഹം. കാഴ്ചശക്തി പോലും നഷ്ടപ്പെട്ട അവസ്ഥയിലാണ് അന്ന് അദ്ദേഹം ഉണ്ടായിരുന്നത്.

വറഖതിന്റെ അടുക്കൽ എത്തിയപ്പോൾ ഖദീജ (റ) തന്റെ സഹോദരപുത്രൻ പറയുന്നത് ഒന്ന് കേൾക്കാൻ അഭ്യർത്ഥിച്ചു. തുടർന്ന് പ്രവാചകൻ (സ) ഹിറാ ഗുഹയിൽ വെച്ച് കണ്ട കാര്യങ്ങളും ജിബ്‌രീൽ (അ) ഓതിക്കേൾപ്പിച്ച വിശുദ്ധ വചനങ്ങളും വറഖതിന് മുന്നിൽ സവിസ്തരം വിശദീകരിച്ചു.

പ്രവാചകന്റെ വാക്കുകൾ കേട്ടപാടെ വേദപണ്ഡിതനായ വറഖത് ആ സത്യം തിരിച്ചറിഞ്ഞു. അല്ലാഹു മൂസാ (അ) യുടെ അടുക്കൽ അയച്ച അതേ രഹസ്യ ദൂതൻ നാമൂസ് (ജിബ്രീൽ) തന്നെയാണ് അവിടുത്തെ അടുക്കലേക്ക് വന്നിരിക്കുന്നതെന്ന് അദ്ദേഹം ആവേശത്തോടെയും ആദരവോടെയും പ്രഖ്യാപിച്ചു. തുടർന്ന് അവിടുന്ന് നേരിടാൻ പോകുന്ന ഭാവി പരീക്ഷണങ്ങളെക്കുറിച്ച് മുന്നറിയിപ്പ് നൽകിക്കൊണ്ട്, സ്വന്തം ജനങ്ങൾ പ്രവാചകനെ നാട്ടിൽ നിന്ന് പുറത്താക്കുന്ന ഘട്ടത്തിൽ താൻ ജീവിച്ചിരുന്നെങ്കിൽ എന്ന് അദ്ദേഹം ആശിച്ചുപോയി.

തന്റെ സ്വന്തം ജനങ്ങൾ തന്നെ നാട്ടിൽ നിന്ന് പുറത്താക്കുമോ എന്ന് പ്രവാചകൻ (സ) അത്ഭുതത്തോടെ ചോദിച്ചപ്പോൾ, പ്രവാചകൻ കൊണ്ടുവന്നതുപോലെയുള്ള സത്യദൂതുമായി വന്ന ഏതൊരു മനുഷ്യനെയും ജനങ്ങൾ ശത്രുവായി കാണുകയും ഉപദ്രവിക്കുകയും ചെയ്തിട്ടുണ്ടെന്ന് വറഖത് വ്യക്തമാക്കി. പ്രവാചകന്റെ ആ പ്രബോധന ദിനങ്ങളിൽ താൻ ജീവിച്ചിരിക്കുകയാണെങ്കിൽ എല്ലാ ശക്തിയുമെടുത്ത് സഹായിക്കുമെന്നും അദ്ദേഹം ഉറപ്പുനൽകി.

എന്നാൽ ഈ സംഭവത്തിന് തൊട്ടുപിന്നാലെ, ദിവ്യബോധനം താത്കാലികമായി നിലച്ച കാലഘട്ടത്തിൽ തന്നെ വറഖത് ബിൻ നൗഫൽ മരണപ്പെടുകയാണുണ്ടായത്. 

♦️വറഖത് ബിൻ നൗഫൽ മരണപ്പെട്ടതിന് ശേഷം അദ്ദേഹത്തിന്റെ പരലോക പദവിയെക്കുറിച്ച് പ്രവാചകനോട് ചോദിക്കപ്പെട്ടപ്പോൾ പ്രവാചകൻ (സ) പറഞ്ഞത് സുനൻ അത്തീർമിദിയിൽ നിവേദനം ചെയ്തിട്ടുണ്ട്:

​ഹദീസ് നമ്പർ: 2288 (സുനൻ അത്തീർമിദി).

​ പ്രവാചകൻ (സ) പറഞ്ഞു: "നിങ്ങൾ വറഖതിനെ ശകാരിക്കരുത്, കാരണം അദ്ദേഹം വെള്ള വസ്ത്രങ്ങൾ ധരിച്ച് സ്വർഗ്ഗത്തിലരിക്കുന്നത് ഞാൻ സ്വപ്നത്തിൽ കാണുകയുണ്ടായി." (ഈ ഹദീസ് അൽ-ഹാകിമും സ്വഹീഹാക്കിയിട്ടുണ്ട്).

ഹദീസ് റഫറൻസുകൾ:

  സ്വഹീഹുൽ ബുഖാരി 

   ഹദീസ് നമ്പർ: 3 (കിതാബു ബദ്ഇൽ വഹ്യ് - كيف كان بدء الوحي إلى رسول الله).

 സ്വഹീഹ് മുസ്ലിം (Sahih Muslim):

    ഹദീസ് നമ്പർ: 160 (കിതാബുൽ ഈമാൻ - باب بَدْءِ الْوَحْيِ إِلَى رَسُولِ اللَّهِ).

#മുഹമ്മദ്നബിﷺയുടെജീവചരിത്രം